މިސްރުގެ އެންމެ ފަހުގެ މިނިވަން އެއް ނޫސްކަމަށްވާ މަދާ މަސްރު ނޫހުގެ އެޑިޓަރާއި އެހެން ތިން ނޫސްވެރިއަކަށް ޖިނާއީ ކުށުގެ ދައުވާ އުފުލައިފިއެވެ. މިސްރުގެ މީޑިއާއާއި މަދާ މަސްރުން ބުނާ ގޮތުގައި މިއީ މީޑިއާ ރިޕޯޓް ކުރުމުގެ ސަބަބުން ބިރުދައްކައި އަދަބު ދިނުމަށް ސަރުކާރުން ކުރާ މަސައްކަތެކެވެ.
ދައުވާ ކޮށްފައިވާ ހަތަރު މީހުންނަކީ ޒުވާން ހަތަރު އަންހެން ނޫސްވެރިންނެވެ.
އިންގިލާބެއްގައި ޑިމޮކްރެޓިކް ސަރުކާރެއް ވައްޓާލައި ވެރިކަމަށް ވަޑައިގަތް މިސްރުގެ ޖެނެރަލް އަބްދެލް ފައްތާހު އައްސީސީއަކީ މީޑިއާގެ މިނިވަންކަމަށް ބީރައްޓެހި ބޭފުޅެކެވެ.
މަދާ މަސްރާ ދެކޮޅަށް ދައުވާ ކޮށްފައި ވަނީ ފޭކް ނިއުސް ޝާއިއުކުރުމާއި، ސޯޝަލް މީޑިއާ ނުބައިކޮށް ބޭނުންކުރުމާއި، ޕާލަމެންޓްގެ މެމްބަރުންނަށް ފުރައްސާރަކުރި ކަމަށް ބުނެއެވެ.
މަދާ އިން ވަނީ ވެރިކަން ކުރާ ފަރާތާއި ގާތްގުޅުމެއް އޮންނަ މުސްތަގްބަލު ވަޠަން ޕާޓީގެ އެމްޕީންގެ ބައިވެރިވުމާއެކު ހިނގަމުންދާ ކޮރަޕްޝަންގެ މައްސަލައެއް އެންޓިކޮރަޕްޝަން ކޮމިޝަނުން ތަހުގީގު ކުރަމުންދާ ކަމަށާއި ސާބިތު ވެއްޖެނަމަ ބޮޑެތި މީހުންގެ މަގާމު ގެއްލޭނެ ކަމަށް ބުނެ ތަހުގީގީ ރިޕޯޓެއް ޝާއިއުކޮށްފައެވެ.
