ޕެސިފިކް ސަރަހައްދުގެ ގައުމެއް ކަމަށްވާ މާޝަލް އައިލެންސްގެ ސަރުކާރު މަސްއޫލުވެރިންނާއި ޕާލަމެންޓް މެމްބަރުންނަށް ރިޝްވަތު ދީގެން ގާނޫނެއް ފާސްކޮށް އެ ގައުމުގައި ދެ ޖަޒީރާއެއްގައި ސްޕެޝަލް އިކޮނޮމިކް ޒޯން (އެސްއީޒެޑް)އެއް ހެދުމަށް މަސައްކަތް ކުރި ޗައިނާގެ ދެ މަފިރިއަކާ ދެކޮޅަށް ނިއުޔޯކްގައި ދައުވާ ކޮށްފިއެވެ.
މި ދެ މަފިރިން އުޅުނީ މާޝަލް އައިލެންޑްސްގައި އޮންނަ ފާޅު ދެ ރަށެއްގައި އެސްއީޒެޑް ސަރަހައްދެއް ގާއިމު ކޮށް އެތަނަށް ޗައިނާ އިންވެސްޓަރުން ހޯދައި ޗައިނާއާ އެ ދެ ރަށް ގުޅުވާށެވެ.
ނިއުޔޯކްގައި މި ދެ މަފިރިންނަށް ދައުވާ ކޮށްފައި ވަނީ އެމީހުން ނިއުޔޯކްގައި ހެދި އެންޖީއޯއެއް މެދުވެރިކޮށް ރިޝްވަތު ދޭން ފައިސާ އަނބުރާފައިވާތިއެވެ.
މާޝަލް އައިލެންޑްގެ ސަރަހައްދަކީ 1979އާ ހަމައަށް އެމެރިކާއިން ބަލަހައްޓަމުން އައި ސަރަަހައްދެކެވެ.
އެމެރިކާގެ ޕްރޮސެކިއުޓަރުން ބުނާ ގޮތުގައި ޗައިނާގެ ދެ ރައްޔިތެއްކަމަށްވާ ކެރީ ޔާން އާއި ޖިނާ ޒޯއިން ވަނީ މާޝަލް އައިލެންޑްސްގެ އިސްތިގްލާލު ނަގާލުމަށް މަސައްކަތް ކޮށްފައެވެ.
މި ދެމީހުން ވަނީ ރިޝްވަތް ދީގެން ޕާލަމެންޓް މެމްބަރުން ލައްވައި އެސްއީޒެޑްގެ ގާނޫނެއް ފާސް ކުރުވަން އުޅެފައެވެ. 2018ގައި ކުރި މަސައްކަތް ނާކާމިޔާބު އެއިރުގެ ރައީސް އެކަމާ ދެކޮޅު ހެދުމުންނެވެ. ފަހުން އޭނާ އިންތިޚާބުގައި ނާކާމިޔާބު ކޮށްލުމަށްފަހު 2020ގައި އެ ބިލް ފާސް ކުރެވުނެވެ. ނަމަވެސް އެ ދެމަފިރިން ބެންކޮކްގައި ހައްޔަރު ކުރުމުން އެސްއީޒެޑްގެ މަސައްކަތް ކރިއަށް ގެންދެވޭ ގޮތެއް ނުވިއެވެ.
މާޝަލް އައިލެންޑްސްގެ ޕާލަމެންޓް މެމްބަރުންނަށް 22 ހާހާއި 7 ހާހާ ދެމެދުގެ އަދަދަކަށް ރިޝްވަތު ދީފައި ވެއެވެ. އަދި އެމީހުން އެމެރިކާއާއަށާއި ހޮންގކޮންގއަށް ދަތުރުތަކުގައި ގެން ގޮސް ކާންދިނުމާއި ދަތުރުގެ ޚަރަދު ހަމަޖައްސައި ދީފައި ވެއެވެ.
މި ދެމީހުން 2020 ވަނަ އަހަރު ތައިލެންޑުގައި ހިފަހެއްޓުމަށް ފަހު މިދިޔަ ހަފްތާގައި ވަނީ އެމެރިކާއާ ހަވާލުކޮށްފައެވެ. ނިއުޔޯކްގައި އެމީހުންގެ ޝަރިއަތް ފަށާފައި ވެއެވެ.
