އިންޑިއާ އާއި ޗައިނާ ސިފައިން ވަނީ އިރުމަތީ ލަދާކްގެ ގޯގްރާ ހޮޓް ސްޕްރިންގްސް ސަރަހައްދުގައި ދެ ފަރާތުގެ ސިފައިން ކުރިމަތިލައިގެން ތިބޭ 15 ވަނަ ޕެޓްރޯލިން ޕޮއިންޓްއިން ދުރަށް ޖެހެން ފަށާފައެވެ. އެހެންނަމަވެސް، ޑެމްޗޮކް އާއި ސްޓްރެޓެޖިކް ސަރަހައްދެއްކަމަށްވާ ޑެޕްސަންގްގެ ހާމަ ބިންތަކުގައި ޗައިނާ ސިފައިން ދުރަށް ޖެހުމުގެ ވިސްނުމެއް އަދި ނުގެންގުޅެއެވެ.
ޗައިނާ ސިފައިން ވަނީ އިންޑިއާ ސިފައިންނާ ކުރިމަތިލާން ފެށިފަހުން ގެލްވާން ވާދީގެ އުސް ސަރަހައްދުގައި 28 މަސް ދުވަހުގެ ދިގު އަސްކަރީ ކުރިމަތިލުންތަކެއް ކުރިއަށް ގެންގޮސްފައެވެ.
ދެ ފަރާތުން ވަނީ 15 ބުރުގެ މަޝްވަރާތައް މިދިޔަ އަހަރަކަށް ވުރެން ގިނަ ދުވަސް ތެރޭގައި ބާއްވާފައެވެ. މުހައްލިލުން ބުނާ ގޮތުގައި 15 ވަނަ ޕެޓްރޯލިންގ ޕޮއިންޓުން ޗައިނާ ސިފައިން ދުރަށް ދިއުމަކީ އޭގެ ޒާތުގައި މާ ބޮޑު ކާމިޔާބީއެއް ނޫނެވެ. އިންޑިއާއިން ބާރުއަޅަނީ ދެފަރާތުން ކުރިންވެސް މަޝްވަރާ ކޮށްފައިވާ ގޮތަށް ދެ ފަރަތިގެ އެސްބަވުންތަކަށް އިޙުތިރާމް ކޮށް ޑެޕްސަންގް އާއި ޑެމްޗޮކްގައިވެސް ޗައިނާ ސިފައިން ދުރަށް ދިއުމަށެވެ.
ޕެޓްރޯލް ޕޮއިންޓް 15ގައި ޗައިނާ ސިފައިން ދުރަށް ޖެހުނީ، އިންޑިއާގެ ބޮޑު ވަޒީރު ނަރެންދުރަ މޯދީ އާއި ޗައިނާގެ ރައީސް ޝީ ޖިންގްޕިންގްގެ ދެ ބޭފުޅުން އުޒުބެކިސްތާންގެ ސަމަރުކަންދުގައި ބައްދަލުކުރައްވާނެތީ އެކަމަށް މަގުފަހި ކުރުމުގެގޮތުންނެވެ.
ސެޕްޓެމްބަރު 15ނ 16 އަށް އުޒްބެކިސްތާނުގެ ސަމަރުކަންދުގައި ބާއްވާ ޝަންހާއީ ކޯޕަރޭޝަން އޮގަނައިޒޭޝަންގެ ސަމިޓުގެ ހަވާސާގައި ދެ ބޭފުޅުން ބައްދަލު ކުރައްވާނެ ކަމަށް ބެލެވެއެވެ. މި ބައްދަލލު ކުރެއްވުމާ ބެހޭ ގޮތުން އަދި ދެ ގައުމުން ކަށަވަރުކޮށްދީފައެއް ނުވެއެވެ.
