ޗައިނާގައި މެޑިސިން ކިޔަވަން ދާ އިންޑިއާ ދަރިވަރުންނަށް އިންޑިއާއިން ވަނީ ފުރިހަމަ އެޑްވައިޒަރީއެއް ނެރެފައެވެ. އެޑްވައިޒަރީގައި ނަސޭހަތްތެވެ ސަމާލު ވުމަށް ބުނެފައިވާ ކަންކަމުގެ ތެރޭގައި ޗައިނާގައި ކިޔެވުމަށްފަހު ކުރިމަތިވާ ގޮންޖެހުންއް ކިޔައި ދީފައި ވެއެވެ.
އޭގެ ތެރޭގައި ދަރިވަރުންގެ ފާސް ޕަސެންޓް ދަށްވުމާއި ޗައިނާގެ ރަސްމީ ބަސް ދަސްކުރަންޖެހޭ ކަމާއި އަދި އިންޑިއާގައި ޑޮކްޓަރެއްގެ ގޮތުގައި ޕްރެކްޓިސް ކުރުމަށް ކަނޑައެޅިފައިވާ ހަރުކަށި އުސޫލުތަކަށް ދަރިވަރުން ސަމާލުވާން އެދިފައި ވެއެވެ.
ބެއިޖިންގައި ހުންނަ އިންޑިއާ އެމްބަސީން މި އެޑްވައިޒަރީ ނެރުނީ ދަރިވަރުންގެ ފަރާތުން ލިބޭ ސުވާލުތަކަށާއި ދަރިވަރުންގެ ޝަކުވާތަކަށް ބަލައިފައެވެ.
އެގޮތުން އިންޑިއާގައި ޕްރެކްޓިސް ކުރުމަށް ޝަރުތު ހަމަވުމަށް ޗައިނާގައި ކިޔަވާ ދަރިވަރުން ފާސްވާ ނިސްބަތް 2015 އާއި 2021 އާ ދެމެދު އޮތީއެންމެ 16 އިންސައްތައިގައެވެ.
އަދި ޗައިނާގައި ކިޔަވައިދޭ މުދައްރިސުންގެ އިނގިރޭސި ބަހުގެ ހުނަރު ދަށްވުމާއި ޗައިނާގެ ޔުނިވާސިޓީތަކުން ދޭ ތައުލީމުގެ ފެންވަރަށް ރޭންކިން ނެތުމާ ގުޅޭ ގޮތުން ކުރިން ޗައިނާގައި ކިޔަވާފައިވާ އިންޑިއާ ދަރިވަރުންގެ ފަރާތުން ލިބިފައިވާ ފީޑްބެކް ވެސް ހިމަނާފައި ވެއެވެ.
ޗައިނާގެ މިނިސްޓްރީ އޮފް އެޑިޔުކޭޝަންގެ ގަވާއިދުގައިވާ ގޮތުގެ މަތިން މި ކޯސްތައް ހިންގަނީ އިނގިރޭސި ބަހުން ކަމުގައިވިއަސް ނަމަވެސް ކްލިނިކަލް ސެޝަންތަކަށް ޗައިނާ ބަސް ދަސްކުރުމަކީ ލާޒިމު ކަމެކެވެ. އެހެންކަމުން ކޮންމެ ދަރިވަރަކު ވެސް އެޗްއެސްކޭ-4 ލެވެލްއާ ހަމައަށް ޗައިނީސް ބަސް ދަސްކުރަން ޖެހޭ ކަމަށް އެޑްވައިޒަރީގައި ބުނފައިވެއެވެ.
