ރާނީ އެލިޒަބަތު ދެވަނަ ލިޔުއްވާފައިވާ ސިއްރު ފަތްކޮޅެއް ތަޅުލާފައި އޮތް ތިޖޫރީ އެއްގައި ސިޑްނީގައި ބާއްވާފައިވާ ކަމަށް އޮސްޓްރޭލިއާގެ މީޑިއާއިން ބުނެފިއެވެ. މި ޚަބަރުގެ އެންމެ ޝައުގުވެރިވާ ކަމަކީ އެ ފަތްކޮޅު އިތުރު 63 އަހަރު ވަންދެން އޭގެ ސިއްރުކަންމަތީގައި އޮންނާނެއެވެ.
7ނިއުސް އޮސްޓްރޭލިއާ އިން ބުނާ ގޮތުގައި މި ފަތްކޮޅު ރައްކާކޮށްފައި ވަނީ ސިޑްނީގެ ތާރީޚީ އިމާރާތެއްގެ ވޯލްޓެއްގެ ތެރޭގައެވެ. މިއީ 1986 ވަނަ އަހަރުގެ ނޮވެމްބަރު މަހު އެކަމަނާ ލިޔުއްވި ފަތްކޮޅެކެވެ. އަދި އެއީ ސިޑްނީގެ ރައްޔިތުންނަށް މުހާތަބުކުރައްވާފައިވާ ފަތްކޮޅެކެވެ.
އެ ފަތްކޮޅުގައި ލިޔުއްވާފައިވާ އެއްޗެއް އެއްވެސް މީހަކަށް ނޭނގެއެވެ. ޚުދު ރާނީގެ އަމިއްލަފުޅު މުވައްޒަފުންނަށް ވެސް އޭގެ މައުލޫމާތެއް ނެތެވެ.
މި ފަތްކޮޅު ވަނީ ރައްކާތެރި ތަނެއްގައި ބިއްލޫރި ކޭހެއްގެ ތެރޭގައި ފޮރުވާފައިއެވެ. ނަމަވެސް ޔަގީންވާ އެއް ކަމަކީ 2085 ވަނަ އަހަރާ ހަމައަށް އެ ތިޖޫރީއެއް ނުހުޅުވޭނެ ކަމެވެ.
ސިޑްނީގެ ލޯޑް މޭޔަރަށް މުޚާޠަބުކުރައްވައި ލިޔުއްވާފައިވާ އިރުޝާދުގައި ރާނީ ވިދާޅުވެފައި ވަނީ "މީލާދީން 2085 ވަނަ އަހަރު މަނިކުފާނު އިޚުތިޔާރު ކުރައްވާ މުނާސިބު ދުވަހެއްގައި، މި ސިޓީއުރަ ހުޅުއްވަވައި، ސިޑްނީގެ ރައްޔިތުންނަށް އަޅުގަނޑުގެ މެސެޖު ފޯރުކޮށްދެއްވުން އެދެމެވެ."
އެ އިރުޝާދުގައި ސޮއިކުރައްވާފައި ވަނީ "އެލިޒަބަތު އާރ" ޖައްސަފާވައެވެ.
އޮސްޓްރޭލިއާގެ ދައުލަތުގެ ވެރިޔާގެ ހައިސިއްޔަތުން ރާނީ އެލިޒަބަތު ދެވަނަ ވަނީ 16 ފަހަރު އޮސްޓްރޭލިއާއަށް ވަޑައިގެންފަ އެވެ.
އޮސްޓްރޭލިއާއަށް ކުރެއްވި މަޝްހޫރު ފުރަތަމަ ދަތުރުފުޅުން ފެށިގެން، މިހާތަނަށް އެގައުމަށް ވަޑައިގެންނެވި ހަމައެކަނި އިނގިރޭސި ތަޚުތުގެ ވެރިކަމުގެ ވެރިޔާ، ރާނީ އެލިޒަބަތު އޮސްޓްރޭލިއާއަށްޓަކައި ހިތުގައި ޚާއްސަ މަގާމެއް ގެންގުޅުއްވިކަމަށް އޮސްޓްރޭލިއާގެ ބޮޑުވަޒީރު އެންތޮނީ އަލްބަނީޒް ހުކުރު ދުވަހު ނެރުނު ބަޔާނެއްގައި ވިދާޅުވި އެވެ.
1999 ވަނަ އަހަރު އޮސްޓްރޭލިއާގައި ރާނީ ދައުލަތުގެ ވެރިޔާގެ މަގާމުން ވަކިކުރަންވީތޯ ބެލުމަށް ފެންނަ ނުފެންނަ ވޯޓެއް ބޭއްވި ނަމަވެސް އެ ވޯޓު ނާކާމިޔާބުވިއެވެ.
