ޗައިނާގެ ވެރިކަންކުރާ ކޮމިއުނިސްޓް ޕާޓީގެ މުހިއްމު ބައްދަލުވުމެއްގެ ކުރިން ހަފްތާތަކެއް ވަންދެން ކޮރޯނާ ވައިރަސް ލޮކްޑައުންގެ ދަށަށް ދިހަ މިލިއަން މީހުން ގޮސްފައި ވެއެވެ. ކާބޯތަކެއްޗާއި ބޭސްފަރުވާއަށް މީހުން ކުރާ އިލްތިމާސްތައް މުޅި ޗައިނާގައި ފެތުރެމުން އެބަދެއެވެ.
ދުނިޔޭގެ ބޮޑު ބައެއްގައި ކޮވިޑް-19 ގެ ބަލިމަޑުކަން ފަހަނައަޅައި ދާއިރު، ޗައިނާ އަދިވެސް އޮތީ ތާށިވެފައެވެ. ޗައިނާ ލީޑަރު ޝީ ޖިންޕިންގް ގެންގުޅުއްވާ "ޒީރޯ ކޮވިޑް" ސިޔާސަތު ދެމެހެއްޓުމަށް ކޮމިއުނިސްޓް ޕާޓީން ދަނީ އަމުރުތައް ކުރަމުންނެވެ.
މި ލޮކްޑައުންތަކުގެ ސަބަބުން އާބާދީއަށް ދަނީ އިގްތިސާދީ އަދި ނަފްސާނީ ގޮތުން ވަރަށް ބޮޑު އަސަރެއް ކުރަމުންނެވެ.
ޝީ އަންނަ މަހު ފަސް އަހަރުގެ ތިން ވަނަ ދައުރެއް ކަށަވަރުކުރުމަށް ހަމަޖެހިފައިވާއިރު، މިއީ ރައީސްކަމުގައި ދެ ދައުރަކަށް ހުންނެވުމަށްފަހު ވެރިކަން ދޫކޮށްލުމުގެ ސަގާފަތާ މިފަހުން ޗައިނާއިން ޚިލާފްވާ ފަހަރެވެ.
މުހިންމު ބައްދަލުވުމެއް ކަމަށްވާ 20 ވަނަ ނޭޝަނަލް ޗައިނީސް ކޮމިއުނިސްޓް ޕާޓީގެ ކޮންގްރެސްގެ ދުވަސްވަރު ލޮކްޑައުންތައް ކުރިއަށްދާނެ ކަމަށް ބެލެވެ އެވެ. ބޮޑު ވަޒީރުގެ ނާއިބް ސަން ޗުންލާން ވަނީ ކޮވިޑްގެ ބައެއް އުދަގޫ ފިޔަވަޅުތައް މިހާރަށް ވުރެން ލުއި ކުރައްވާނެ ކަމަށް އިޝާރާތް ކުރައްވާފައެވެ. ނަމަވެސް ކޮންގްރެސްގެ ކުރިން ބަލި ފުޅާކޮށް ފެތުރުން ހުއްޓުވުމުގެ މުހިންމުކަމަށް ވެސް އޭނާ ވާހަކަ ދެއްކެވިކަމަށް ދައުލަތުގެ ޝިންހުއާ ނިއުސް އެޖެންސީން ބުނެ އެވެ.
