ރައިލާ އޮޑިންގާ ފަސް ފަހަރަށް މަސައްކަތް ކުރެއްވުމުންވެސް ވެރިކަމެއް ލިބިވަޑައި ނުގަތެވެ. ކެންޔާގެ ފަސް ވަނަ ރައީސްކަމަށް ސުޕްރީން ކޯޓުން ނަތީޖާ ސައްހަ ކަމަށް އިއުލާން ކުރުމުން އާ ރައީސް ވިލިއަމް ރޫޓޯ ހުވާ ކުރެއްވީ މިއަދުއެވެ. އޭނާއަށް ތާއީދު ކުރާ ދިހަހާސް މީހުން ސްޓޭޑިއަމްގައި އޮތް ރަސްމިއްޔާތުގައި ބައިވެރިވިއެވެ.
އޮޑިންގާ ހުންނެވީ ގޭގައެވެ.
ކުރީގެ ނައިބު ރައީސް ރޫޓޯ އަކީ އޮގަސްޓް މަހުގެ ނުވަ ވަނަ ދުވަހު ބެއްވި އިންތިޚާބު ހަނި އަޣުލަބިއްޔަތަކުން ކާމިޔާބު ކުރެއްވި ކެންޑިޑޭޓެވެ.
ހުވާ ކުރުމުގެ ރަސްމިއްޔާތަށް ފަތިހު 5 ޖެހިއިރު މީހުން ސްޓޭޑިއަމަށް ވަދެ ފުރާލައިފިއެވެ. 60،000 މީހުންގެ ޖާގައިގެ ކަސަރާނީ ސްޕޯޓްސް ސެންޓަރު ފުރި ބާރުވުމުން ފިތިގެން ބައެއް މީހުންނަށް އަނިޔާވެފައި ވެއެވެ.
