އދ. ގެ އާންމު މަޖިލީހުގައި ބައިވެރިވުމަށް ރަޝިޔާގެ ފޮރިން މިނިސްޓަރު ސާޖޭ ލަވްރޯވް އާއި ރަޝިޔާ ވަފުދެއްގެ މެމްބަރުންނަށް ވިސާ ދީފައިވާ ކަމަށް ރަޝިޔާއިން ބުނެފިއެވެ. އެވަފުދަށް ވިސާ ދީފައިވަނީ ވިސާ ނުދީ ހިފެހެއްޓުމަށްފަހުގައެވެ.
ނިއުޔޯކުގައި މިއަދު ހުޅުވާލާ އދގެ އާންމު މަޖިލީހުގެ 77 ވަނަ ޖަލްސާގައި ބައިވެރިވުމަށް ރަޝިޔާގެ ވަފުދުގެ މެންބަރުންނަށް ވިސާ ނުދީ ހިފަހައްޓަން އުޅުމުން އެމެރިކާއަށް ފާޑުކިޔުން އަމާޒުވަމުން އަންނަތާ ހަފްތާތަކެއް ވަނީ ވެފައެވެ.
"މިއަދު ވިސާ ދީފައި ވަނީ ލަވްރޯވް އާއި އޭނާއާއެކު ވަޑައިގަންނަވާނެ އަދަދެއްގެ ބަޔަކަށް،" ރަޝިޔާ ފޮރިން މިނިސްޓްރީއާ ހަވާލާދީ އިންޓަފެކްސް އިން ބުނެފައިވެއެވެ.
ރަޝިޔާގެ މަންދޫބުން ބައިވެރިވުމަށް ވިސާ ދިނުން ލަސްކޮށް، އާންމު މަޖިލީހުގައި ރަޝިޔާއަށް ފުރިހަމައަށް ބައިވެރިވުން ހުއްޓުވަން އެމެރިކާ މަސައްކަތް ކުރަމުންދާ ކަމަށް މޮސްކޯއިން ތުހުމަތުކޮށްފައި ވެއެވެ.
ކްރެމްލިން އިން އަންގާރަ ދުވަހު ބުނީ ރަޝިޔާގެ މުޅި ވަފުދަށް ވިސާ ނުދިނުމުން އެމެރިކާއިން "އެގައުމުގެ ބައިނަލްއަގްވާމީ ވާޖިބުތަކާ ހިލާފުވާ" ކަމަށާއި އެ ހާލަތާ މެދު އދ.އާއި އެމެރިކާވެސް ޖަވާބުދާރީ ކުރުވުމަށް ފިޔަވަޅު އަޅަމުންދާކަމަށެވެ.
