އޮޒެން މާދޫ ރިސޯޓުގެ މުވައްޒަފުންނަށް، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން އިންޑަސްޓްރިއަލް ފަޔަރ ބްރިގޭޑް ކޯހެއް ފަށައިފި ކަމަށް އެމްއެންޑީއެފުން ބުނެފިއެވެ.
އެތަނުން ބުނެފައިވަނީ މި ކޯސް ފަށައިފައިވަނީ ވިލިމާލޭގައި ހުންނަ އެމްއެންޑީއެފް ފަޔަރ އެންޑް ރެސްކިޔު ޓްރެއިނިންގ ސްކޫލުގައި ސެޕްޓެންބަރު މަހުގެ 17 ވަނަ ދުވަހު ކަމަށެވެ. އެދުވަހުން ފެށިގެން 3 ދުވަސް ވަންދެން ކޯސް ކުރިއަށް ގެންދާނެެއެވެ. މި ކޯހުގައި އޯޒެން މާދޫ ރިސޯޓުގެ 09 މުވައްޒަފަކު ބައިވެރިވެއެވެ.
މި ކޯހުގައި ކިޔަވައިދޭ ބައިތަކުގެ ތެރޭގައި އަލިފާނުގެ ހާދިސާއެއް ހިނގައިފިނަމަ ޢަމަލު ކުރަން ޖެހޭނެ ގޮތްތަކާއި އަލިފާން ނިއްވުމަށް ބޭނުންކުރާ ސާމާނުތައް ބޭނުންކޮށްގެން އަލިފާން ނިއްވާނެ ގޮތްތައް ދަސްކޮށްދިނުން ހިމެނެއެވެ.
މި ކޯހަކީ ރިސޯޓުތަކުގައި ޤާއިމުކުރެވޭ އިންޑަސްޓްރިއަލް ފަޔަރ ސްކޮޑުގެ މުވައްޒަފުންނަށް އަލިފާން ނިއްވުމުގެ މަސައްކަތް ކުރެވޭ ފެންވަރަށް ޢިލްމާއި ހުނަރު އުގަންނައިދީ، ތަމްރީނު ކުރުމަށް ހިންގާ ކޯހެކެވެ.
މި ޕްރޮގްރާމުގައި މުދައްރިބުންގެ ގޮތުގައި ހަރަކާތްތެރިވަނީ އެމްއެންޑީއެފް ފަޔަރ އެންޑް ރެސްކިޔު ޓްރެއިނިންގ ސްކޫލުގެ ފަޔަރމަނުންނެވެ.
