މަހަށް ނުކުމެ އުޅުނު ދޯންޏެއްގައި ހުރި މަސްވެރިއަކު ވެއްޓި ޒަޚަމްވުމުން، އެމްއެންޑީއެފް ނޮދަން އޭރިއާ ކޯސްޓްގާޑު ފަސްޓް ސްކޮޑްރަންގެ ސިފައިން އެމީހާއަށް އެހީތެރިކަން ފޯރުކޮށްދީފިއެވެ.
މި އަނިޔާ ލިބިފައިވަނީ ޅ.އަތޮޅު އެތެރެވަރިން ޅ.ކުރެންދޫގެ އިރުން 5 ނޯޓިކަލް މޭލު ބޭރުން މަސްވެރިކަމަށް ނުކުމެ އުޅުނު "އަރާކުރި" ނަމަކަށް ކިޔާ މަސް ދޯންޏެއްގައި ހުރި 40 އަހަރުގެ މީހަކަށެވެ.
މި ހާދިސާގެ މަޢުލޫމާތު އެމްއެންޑީއެފް ނޮދަން އޭރިއާ ކޯސްޓްގާޑު ފަސްޓް ސްކޮޑްރަންއަށް ލިބުނީ މިއަދު 13:30 އެހައިކަންހާއިރުއެވެ. އަދި، ހާދިސާގެ މަޢުލޫމާތު ލިބުމާއެކު، އެމްއެންޑީއެފް ނޮދަން އޭރިއާ ކޯސްޓްގާޑު ފަސްޓް ސްކޮޑްރަންއިން އެ ދޯނި އޮތް ސަރަހައްދަށް ގޮސް، ޒަޚަމްވެފައިވާ މީހާއަށް އެހީތެރިކަން ފޯރުކޮށްދިނުމުގެ ގޮތުން، އެމްއެންޑީއެފް ކޯސްޓްގާޑު "ހާބަރ ކްރާފްޓް 115" އުޅަނދަށް އެ މީހާ ނެގުމަށްފަހު، މިއަދު 14:18 އެހައިކަންހާއިރު ވަނީ ޅ.ނައިފަރަށް ގެންގޮސްދީފައެވެ.
އެމީހާއާ ބެހޭ އިތުރު މައުލޫމާތެއް އަދި ލިބިފައެއް ނުވެއެވެ.
