އިންޑިއާގެ ޓުޓްކޮރިން ބަނދަރުން ފުރައިގެން މާލެއަށް ދަތުރުކުރި ބޯޓެއް އަޑިއަށްގޮސް އެ ބޯޓުގެ ފަޅުވެރިއަކު ގެއްލިގެން ހޯދަންފަށައިފި ކަމަށް އެމްއެެންޑީއެފް އިން މައުލޫމާތު ދީފިއެވެ.
އެ ބޯޓަކީ ސެޕްޓެންބަރު މަހު 28 ވަނަ ދުވަހު އިންޑިއާގެ ޓުޓްކޮރިން އިން ފުރައިގެން މާލެއަށް ދަތުރުކުރަނިކޮށް މޫސުން ގޯސްވެ، ކ. ކާށިދޫގެ އިރުން 30 ނޯޓިކަލް މޭލު ބޭރުން ދަތުރުކުރަނިކޮށް އަޑިއަށްދިޔަ ބޯޓެއްކަމަށް އެމްއެންޑީއެފް އިން ބުންޏެވެ.
އެ ބޯޓުން ދަތުރުކުރި 7 ފަޅުވެރިންގެ ތެރެއިން 6 ފަޅުވެރިއަކު ކަނޑުވެފައިވަނިކޮށް، އެސަރަޙައްދުން ދަތުރުކުރަމުން ދިޔަ "އެމްވީ ބަރަދުވާޖް" ނަމަކަށްކިޔާ ބޯޓަކުން ވަނީ ސަލާމަތްކޮށްފައެވެ. އަދި އެ ބޯޓުގެ އެއް ފަޅުވެރިއަކު ފެނިފައިނުވާތީ، އެމްއެންޑީއެފް ކޯސްޓްގާޑުގެ "ހަކުރާ" ލޯންޗްދަނީ އެމީހާ ހޯދުމުގެ މަސައްކަތް ކުރަމުން ކަމަށް އެމްއެންޑީއެފް އިން މައުލޫމާތު ދިނެވެ.
އެ ހާދިސާގެ ރިޕޯޓު އެމްއެންޑީއެފް ކޯސްޓްގާޑަށް ލިބިފައިވަނީ އިއްޔެ 10.30 ކަމަށް އެމްއެންޑީއެފް އިން ބުންޏެވެ. މައުލޫމާތު ލިބިފައިވާގޮތުގައި ގެއްލިގެން ހޯދާ މީހާ ލައިގެންހުރީ ނޫކުލައިގެ ޓީޝާޓަކާއި ނޫކުލައިގެ ސޯޓެކެވެ. އަދި އެންމެފަހުން އޭނާ ފެނުނުއިރު އޮތީ ލައިފް ޖެކެޓް އަޅައިގެން ކަމަށް އެމްއެންޑީއެފް އަށް މައުލޫމާތު ލިބިފައި ވާކަމަށް ހާމަކުރިއެވެ.
ގެއްލިގެން ހޯދާ މީހާއާއި ބެހޭ އެއްވެސް ޚަބަރެއްވޭތޯ އެ ސަރަޙައްދުން އުޅަނދުފަހަރުން ބައްލަވައިދިނުމަށް އެމްއެންޑީއެފް އިން އެދެއެވެ. އަދި އެމީހާ އާއި ބެހޭ އެއްވެސް މައުލޫމާތެއް ލިބިއްޖެނަމަ، ކޯސްޑަގާޑުގެ ހިލޭ ގުޅޭ ނަންބަރު 191 ނުވަތަ 3395981 އަދި 3398898 ފޯނަށް ގުޅުމަށް އެމްއެންޑީއެފް އިން އެދެވެ.
އަޑިއަށް ދިޔަ ބޯޓުން ގެއްލިގެން ހޯދަނީ ކޮން ގައުމެއްގެ މީހެއްކަމެއް އެމްއެންޑީއެފް އިން ހާމައެއް ނުކުރެއެވެ.
