ޔުއެފާ ޗެމްޕިއަންސް ލީގުގައި މިރޭ ރަށުން ބޭރުގައި އިންޓަމިލާން އަތުން 1-0 އިން ބަލިވެ، ގްރޫޕް ސްޓޭޖް ފަހަނަ އަޅައި ދިޔުމަށް ބާސެލޯނާއަށް އުނދަގޫތަކެއް ކުރިމަތިވެއްޖެއެވެ.
މެޗުގައި ފެނިގެންދިޔަ ހަމައެކަނި ލަނޑު، ފުރަތަމަ ހާފުގެ އިތުރު ވަގުތުގައި އިންޓަމިލާނަށް ކާމިޔާބު ކޮށްދިނީ ތުރުކީގެ ބައިނަލްއަގުވާމީ މިޑްފީލްޑަރު ހަކާން ކަލްހަނުގޮލޫއެވެ. ހަކާން މިލަނޑު ޖެހީ ބާސެލޯނާގެ އޭރިޔާގެ ބޭރުން ތިރިތިރިން ގޯލުގެ ކަނަށް އަމާޒުކޮށްލައިގެންނެވެ. ބޯޅަ ދިފާއު ކުރުމަށް ބާސާގެ ކީޕަރު ޓަރ ސްޓެޖެން މަސައްކަތް ކުރިނަމަވެސް އޭނާގެ އަތުގައި ބޯޅަ ޖެހޭ ގޮތެއް ނުވިއެވެ.
ދެވަނަ ހާފުގައި ބާސާއިން ވަނީ ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފައެވެ. މިގޮތުން 66 ވަނަ މިނެޓުގައި މިޑްފީލްޑަރު ޕެޑްރީ ލަނޑެއްވެސް ޖެހިއެވެ. އެކަމަކު ވީއޭއާރު ބެލުމަށްފަހު ރެފްރީ ނިންމީ ވިންގަރ އޮސަމާނޭ ޑެމްބްލޭ އޭރިޔާގެ ތެރެއަށް ނަގައިދިން ހުރަސް ޕެޑްރީއަށް ލިބުމުގެ ކުރިން ފޯވާޑް އަންސޫ ފަޓީގެ އަތުގައި ޖެހުނު ކަމަށެވެ. ރެފްރީގެ ނިންމުމާ ބާސާގެ ކޯޗް ޒަވީ ހެނާންޑޭޒް ހިތްހަމަ ނުޖެހުން ފާޅު ކުރުމުން އޭނާއަށް ރީނދޫ ކާޑްވެސް ދެއްކިއެވެ.
މިމެޗުން ބަލިވުމުން، ގްރޫޕް ސްޓޭޖް ފަހަނަ އަޅައި ދާން ބޭނުންނަމަ އަމިއްލަ ދަނޑުގައި އިންޓަ އާއި ބަޔާންގެ މައްޗަށް ކުރި ހޯދަން ބާސާއަށް ވަނީ މަޖުބޫރުވެފައެވެ. ގްރޫޕުގެ 3 ވަނައިގައި ބާސާ އޮތީ މިހާތަނަށް ކުޅުނު 3 މެޗުން ލިބުނު 3 ޕޮއިންޓާއެކުއެވެ. އިންޓަ ދެވަނައިގައި އޮތީ 6 ޕޮއިންޓާއެކުއެވެ. މިގްރޫޕުގެ އެއްވަނައިގައި އޮތީ ކުޅުނު ތިން މެޗުންވެސް މޮޅުވެ 9 ޕޮއިންޓާއެކު ބަޔާން މިޔުނިކެވެ.
