އިންޑިއާގެ ތާރީޚީ މިސްކިތްތަކަކީ ކުރީގެ ބުދު ފައްޅިތައް ކަމަށް ބުނެ ހައްދުފަހަނައަޅާފައިވާ ހަރުކަށި ހިންދޫން ދައްކަމުންދާ ވާހަކައަށް ބުރަދަނެއް ލިބި މުޖުތަމައު ބައިބައި ވުމަށް އައު ދޮރެއް ހުޅުވައިފިއެވެ.
އިންޑިއާގެ ޖައިޕޫރުގެ އަޖުމޭރު ސިޓިއަކީ ވަލީވެރިޔާ، ޚަވާޖާ މުޢީނުއްދީން ޗިޝްތީގެ ޒިޔާރަތް ހުންނަ ސިޓީއެވެ. މިއީ ހިންދީންނާއި މުސްލިމުންގެ ތެރޭން ޒިޔާރަތަށް ނަދުރު ބުނެ އުޅޭ (ޤަބްރުޕްރަތު) މީހުންގެ މެދުގައި މަގްބޫލު ޒިޔާރަތެކެވެ.
މިއަދު އަޖުމޭރުގެ ކޯޓަކުން ޙުކުމް ކޮށްފައި ވަނީ، ޚަވާޖާ މުޢީނުއްދީން ޗިޝްރީގެ ޒިޔާރަތް ހުރި ތަނަކީ ކުރިން ޝީވާ ބަގްވާނަށް އަޅުކަން ކުރަން ފައްޅިއެއް ހުރި ތަނެއް ކަމަށެވެ. އަދި އެ ޒިޔާރަތުގެ ބައްޓަން ހުންނަނީވެސް ފައްޅިތަކާ ވައްތަރަށް ކަމުން އެފަދަ ގޮތަކަށް ބެލުމަށް ފުރުސަތު އޮތް ކަމަށެވެ.
ނިމިގެން ދިޔ ހަފްތާއަކީ ތާރީޚީ ސަމްބަލް ސިޓީގެ ހުކުރު މިސްކިތުގެ އަޑީގައި ބުދުތަކެއް ވަޅުލާފައިވާ ކަމަށް ބުނެ ސާވޭކުރަން ދިއުމުން ހިނގައި ދިޔަ ހަމަނުޖެހުމުގައި 3 މުސްލިމަކު ޝަހީދުވި ހަފްތާއެވެ.
އައު ހަފްތާއަކަށް މިއޮތީ ބައިބައި ވުމާއި ޚިޔާލު ތަފާތުކޮށްލުމުގެ އައު ހަމަލައެއް ކުރިމަތި ކޮށްފައެވެ.
އަދި ނިމިފިޔަ ހަފްތާއަކީ އިންޑިއާގެ ވެރިކަން ހަރުކަށި ބީޖޭޕީން މުސްލިމުންގެ ވަގުފު ބިންތައް ފޭރިގަތުމަށް އެކުލަވާލާފައިވާ ވަގުފު ގާނޫނަށް ބަހުސްކޮށް ހެދި ހަފްތާއެވެ. އިންޑިއާގެ ބޮޑުވަޒީރު، ނިޝާނު ޢިއްޒުއްދީން ޢިއްޒަތުގެ ވެރިޔާ، ނަރެންދްރާ މޯދީ ވިދާޅުވަނީ އިސްލާމީ ވަޤްފްގެ މަފްހޫމަކީ އިންޑިއާގެ ޤާނޫނުއަސާސީ ދަންނަ މަފްހޫމެއް ނޫން ކަމުގައެވެ.
އިންޑިއާގެ މުސްލިމުންގެ ޝީޢީ ލީޑަރު، ހައިދަރްއާބާދުގެ އެމްޕީ އަސަދުއްދީން އުވައިސީ ވިދާޅުވަނީ މިފަދަ ރޭވުންތަކަކީ މުސްލިމުންނާއި ހިންދީންގެ ދެމެދު ހަމަނުޖެހުން އުފައްދައި ބައިބައި ކޮށްލުމަށް ރާވާ ރޭވުންތަކެއް ކަމަށެވެ.
މިއަދު ކުރި ހުކުމްގައި ފަނޑިޔާރު މޯހަން ޗަންޑަލް ވަނީ ޗިޝްތީ ޒިޔާރަތް ބަލަހައްޓާ އިދާރާއަށާއި އިންޑިއާގެ ހޯމް މިނިސްޓްރީއަށާއި (މާލޭގެ ހުކުރު މިސްކިތް މަރާމާތަށް އަންނަ) އާކިއޮލޮޖިކަލް ސާވޭ އޮފް އިންޑިއާ އަށް އެ ޒިޔާރަތް ހުރިތަން ސާވޭ ކުރުމަށް އަމުރު ކޮށްފައެވެ. މި ދައުވާއަކީ ހައްދުފަނައަޅާފައިވާ ހަރުކަށި ހިންދޫ ސޭނާގެ ހަރުކަށި ހިންދޫއެއް ކަމަށްވާ ވިޝްނޫ ގުޕްތާ ހުށަހެޅި ދައުވާއެކެވެ.
އިންޑިއާގެ އޭބީޕީ ނިއުސް ނެޓްވޯކުން ބުނިގޮތުގައި އަޅުކަން ކުރާ ތަންތަނާ (މިސްކިތްތަކާ) މެދު ހޫނު ބަހުސެއް ކުރެވެމުންދާއިރު މިކަމުން އައު ހަމަނުޖެހުމަކާއި ބަހުސަކަށް ދޮރުހުޅުވާލަނީ ކަމަށެވެ.
މުސްލިމުންގެ ހައްޤަށް މަސައްކަތް ކުރާ އޯލް އިންޑިއާ މުސްލިމު ޕާނަލް ލޯ ބޯޑުން ވަނީ އިންޑިއާގެ އުއްތަމަ ފަނޑިޔާރު މިމައްސަލަ އަށް ޙައްސާސްވެ ވަޑައިގެން ބައިބައިވުމަށް ދޮރުތައް ހުޅުވާ މިފަދަ މައްސަލަތަކަށް ފުރުސަތު ނުދެއްވުމަށް ސޫމޯޓޯ މައްސަލައެއް ހިންގެވުމަށް އެދިވަޑައިގެންފައެވެ.
ކޯޓުގެ އިސްނެގުމަށް އާންމު މަސްލަހަތާ ގުޅުން ހުރި ސޫމޯޓޯގެ މައްސަލަތައް އިންޑިއާގެ ސުޕްރީމް ކޯޓުން ބަލައެވެ. އެމްޑީޕީގެ ވެރިކަމުގައި ސޯލިހުގެ ސަރުކާރުން ވަނީ ރާއްޖޭގެ ޖުޑިޝަރީ ކުޑަކޮށްލުމުގެ ތެރޭން ކޯޓުން އެބާރު ނިގުޅައި ގަނެ ފަނޑިޔާރުން ބިރު ގަންނަވާލާފައެވެ.
