އަންނަ މަހު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަކީ އޭނާގެ އެންމެފަހު ވޯލްޑް ކަޕް ކަމަށް އާޖެންޓީނާގެ ކެޕްޓަން އަދި ފުޓްބޯޅަ ސްޕަރ ސްޓަރ ލިއޮނަލް މެސީ ބުނެފިއެވެ.
ކުރިއަށް އޮތީ މޭސީގެ އެންމެފަހު ވޯލްޑް ކަޕް ކަން އޭނާ ކަށަވަރު ކޮށްދިނީ ދެކުނު އެމެރިކާގެ މަޝްހޫރު "ސްޓަރ+" ސްޓްރީމިންގ ޗެނަލްގެ "ފަސްޓް ޕާސަން" އަށް ރޭ ދިން ބަސްދީގަތުމެއްގައެވެ.
"ޔަގީނުންވެސް މިއީ އަހަރެންގެ އެންމެފަހު ވޯލްޑް ކަޕް. މިއީ ކުރިއާލާ ވިސްނައިގެން ނިންމި ނިންމުމެއް. ވޯލްޑް ކަޕާއި ދެމެދު އޮތް ދުވަސްތައް މިދަނީ ގުނަމުން. މިއާއެކު ހާސްކަމާއި ނުތަނަވަސްކަންވެސް ކުރިމަތިވޭ" މެސީ،35، ބުންޏެވެ.
މެސީގެ ފުޓްބޯޅައިގެ ކެރިޔަރުގައި ވޯލްޑް ކަޕް ތަށި ނޫން އެހެން ހުރިހާ ކާމިޔާބެއް ވަނީ ހޯދާފައެވެ. ކްލަބު ފުޓްބޯޅައިގެ ތާރިހުގައި ދެވަނައަށް އެންމެ ގިނަ ތަށި ހޯދި ކުޅުންތެރިޔާގެ ގޮތުގައި ހުރި މެސީއަށް މިދިޔަ އަހަރާ ހަމައަށް ގައުމީ ޓީމާއެކު ތަށްޓެއް ކާމިޔާބު ނުކުރެވޭތީ ގިނަބަޔަކު ދިޔައީ ފާޑު ކިޔަމުންނެވެ. އެކަމަކު މިދިޔަ އަހަރު ބްރެޒިލްގައި އޮތް ކޮޕާ އެމެރިކާ ފުޓްބޯޅަ މުބާރާތުގެ ފައިނަލުގައި ބްރެޒިލް ބަލިކޮށް އާޖެންޓީނާއިން ޗެމްޕިއަންކަން ހޯދައި މިފާޑުކިޔުންތަކަށް މެސީ ވަނީ ރައްދު ދީފައެވެ.
ވޯލްޑް ކަޕް ކާމިޔާބު ކުރުމާއި އެންމެ ކައިރިއަށް މެސީ ދިޔައީ 2014 ވަނަ އަހަރުއެވެ. އެފަހަރު ފައިނަލުގައި ޖަރުމަނު އަތުން 1-0 އިން ބަލިވީއެވެ. މުބާރާތުގެ ރަންބޯޅަ ލިބުނީ މެސީއަށެވެ.
