މިހާރު ކުރިއަށްދާ އޭއެފްސީ ސަތާރަ އަހަރުން ދަށުގެ ކޮލިފިކޭޝަނުގައި ރޭ 3-0 އިން ކުވައިތު ބަލިކޮށް، މުބާރާތަށް ކޮލިފައިވުމަށް އިންޑިޔާއިން މުހިއްމު ތިން ޕޮއިންޓް ހޯދައިފިއެވެ.
އިންޑިޔާގެ މުސްތަގުބަލުގެ ގައުމީ ޓީމުގެ ގޮތުގައި ބިނާ ކުރަމުން އަންނަ އެގައުމުގެ 17 އަހަރުން ދަށުގެ ގައުމީ ޓީމް މިހޯދި ކާމިޔާބީއާއެކު އެގައުމުގެ ފުޓްބޯޅަ ދަތުރު ކުރަމުން ދަނީ ރަނގަޅު މިސްރާބަކަށް ކަމަށް ގިނަ ފަރާތްތަކުން ދަނީ ބުނަމުންނެވެ.
ރޭގެ މެޗުގައި ކުވައިތު ކޮޅަށް އިންޑިޔާއިން ފުރަތަމަ ލަނޑު ޖެހީ 16 ވަނަ މިނެޓުގައެވެ. މިލަނޑު ކާމިޔާބު ކޮށްދިނީ ތަންގްލަލްސުން ގެންޓޭއެވެ. އިންޑިޔާއިން އަނެއް ދެލަނޑު ޖެހީ ދެވަނަ ހާފުގައެވެ. އިންޑިޔާގެ ދެވަނަ ލަނޑު 66 ވަނަ މިނެޓުގައި ކާމިޔާބު ކޮށްދިނީ ތިންގުޖާމްއެވެ. އިންޑިޔާގެ ތިންވަނަ ލަނޑު ކާމިޔާބު ކޮށްދިނީ ފުރަތަމަ ލަނޑުވެސް ކާމިޔާބު ކޮށްދިން ގެންޓޭއެވެ.
މިނަތީޖާއާއެކު އިންޑިޔާ އޮތީ 6 ޕޮއިންޓާއެކު ގްރޫޕުގެ ދެވަނައިގައެވެ. އެއްވަނައިގައި ސައުދީ އަރަބިއްޔާވެސް އޮތީ 6 ޕޮއިންޓާއެކުއެވެ. އެގައުމަށް ކުރި ލިބެނީ ފައިދާ ލަނޑުގެ ތަފާތުންނެވެ. މިގްރޫޕުގައި ދެން ހިމެނެނީ ރާއްޖެ އާއި މިޔަންމާއެވެ.
ރާއްޖެ ވަނީ މިހާތަނަށް ކުޅުނު ދެމެޗުންވެސް ތަފާތު ބޮޑު ކޮށް ބަލިވެފައެވެ. ރާއްޖެއަށް ބާކީ އޮތީ އަންނަ އާދިއްތަ ދުވަހު މިޔަންމާއާ ދެކޮޅަށް ކުޅެންޖެހޭ މެޗް އެކަންޏެވެ.
