ފުޓްބޯޅައިގައި ކުރިން މަޝްހޫރު މާލެ އަތޮޅު ހުރަޔާއި ގުރައިދޫ އަދި އދ. މާމިގިނލީގައި ފުޓްބޯޅަ ދަނޑުގެ މަސައްކަތް ކޮންޓެކްޓަރުންނާއެކު ކުޅިވަރާ ބެހޭ ވުޒާރާއިން އިއްޔެ ސޮއި ކޮށްފިއެވެ.
ނުވަދިހައިގެ އަހަރު ތަކާއި ދެހާހުގެ ކުރީކޮޅުގެ އަހަރުތަކުގައި ފުރަތަމަ ޑިވިޝަނުގެ ބާރެއްގެ ގޮތުގައ އޮވެ މަޝްހޫރު އެތައް ތަރިންނެއް އުފެއްދި ހުރާގެ ފުޓްބޯޅަ ދަނޑުގައި ހަވާލް ކޮށްފައި ވަނީ ދަނޑު ލެވެލް ކުރުމުގެ މަސައްކަތެވެ. މިމަސައްކަތް ސީއެމްއޭ ފައިވް ސްޓަރ ޕްރައިވެޓް ލިމިޓެޑާ ހަވާލްކޮށްފައި ވަނީ 2.6 މިލިޔަން ރުފިޔާއަށެވެ. މަސައްކަތް ފަންސާސް ދުވަހުގެ ތެރޭގައި ނިންމަން ޖެހެއެވެ.
ކުރިން ފުރަތަމަ ޑިވިޝަނުގައި ވާދަކުރި ގުރައިދޫ އަދި މާމިގިނލީގެ ފުޓްބޯޅަ ދަނޑުގައި ހަވާލް ކޮށްފައި ވަނީ ލައިޓް ޖެހުމުގެ މަސައްކަތެވެ. މިމަސައްކަތް 2.88 މިލިޔަން ރުފިޔާއަށް ހަވާލް ކޮށްފައިވަނީ ވިހި ދުވަސް ތެރޭގައި ނިންމުމަށް ހޯމްސް ޕްރައިވެޓް ލިމިޓެޑާއެވެ.
ރާއްޖޭގެ އެކިރަށްރަށުގައި ފެންވަރު ރަނގަޅު ޓާފް ދަނޑުތައް އެޅުމަކީ ސަރުކާރުގެ ވައުދުގެ ތެރޭގައި ހިމެނިގެން ވަރަށް ބޮޑު އިސްކަމެއް ދީގެން ކުރަމުން އަންނަ މަސައްކަތެކެވެ. މިދަނޑުތަކުގެ އެހީއާއެކު ރާއްޖޭގެ 2023/24 ސީޒަނުގެ އަމާޒަކީ ހޯމްއެންޑް އަވޭ އުސޫލުން ފުޓްބޯޅަ ސީޒަން ކުރިއަށް ގެންދިޔުމެވެ.
