ފްރާންސް ގައުމީ ޓީމުގެ މެދުތެރޭގެ އިންޖީން، އަދި ސަޕޯޓަރުން އިންތިހާއަށް ލޯބިވާ އެންގްލޯ ކަންޓޭގެ ފަލަމަސްގަނޑަށް އަނިޔާވުމުގެ ސަބަބުން ކުރިއަށް އޮތް ވޯލްޑް ކަޕުން އޭނާ ނުފެންނާނެކަން ޔަގީންވެއްޖެއެވެ.
ފްރާންސުން 2018 ވަނަ އަހަރުގެ ވޯލްޑް ކަޕް ކާމިޔާބު ކުރިއިރު މުހިއްމު ދައުރެއް އަދާކުރި ކަންޓޭއަށް އަނިޔާވީ ޗެލްސީގެ ފަރިތަކުރުންތަކުގައި އުޅެނިކޮށެވެ. ކަންޓޭ، ޗެލްސީގެ ފަރިތަކުރުންތަކުގައި ބައިވެރިވެފައި ވަނީ އޭގެ ކުރިން ގިނަދުވަސްތަކެއް ވަންދެން އަނިޔާގައި ހުރުމަށްފަހުކަން ފާހަގަ ކޮށްލެވެއެވެ.
މިސީޒަނުގައި ކަންޓޭއަށް ފުރަތަމަ އަނިޔާވީ މިދިޔަ އޮގަސްޓް މަހު ޓޮޓެންހަމްއާ ދެކޮޅަށް ކުޅެނިކޮށެވެ. އޭގެ ފަހުން އެއްވެސް މެޗެއް އޭނާ ކުޅެފައެއް ނުވެއެވެ.
ޗެލްސީގެ ކޯޗް ގްރަހަމް ޕޮޓާ ބުނީ ކަންޓޭއަށް ކުރިން ލިބުނު އަނިޔާއިން ސަލާމަތްވެ ވޯލްޑް ކަޕުގައި އޭނާއަށް ކުޅެވޭނެ ކަމަށް އުއްމީދު ކުރި ކަމަށާއި އެކަމަކު މިހާރު އެކަމަށް އުއްމީދު ކުރެވެން ނެތް ކަމަށެވެ. "މިވަގުތު ކުރެވެން އޮތް ކަމަކީ އަނިޔާއިން ސަލާމަތްވެ، ފުރިހަމަ ފިޓްނަސްއާއެކު އޭނާ (ކަންޓޭ) ދަނޑަށް ނެރުމަށް މަސައްކަތް ކުރުން" ޕޮޓާ ބުންޏެވެ.
މިއަހަރު ގަތަރުގައި އޮންނަ ވޯލްޑް ކަޕް ފަށާނީ އަންނަ ނޮވެމްބަރު މަހުގެ 20 ވަނަ ދުވަހު ގަތަރާއި އިކްއެޑޯރު ބައްދަލު ކުރާ މެޗުންނެވެ.
