މެންޗެސްޓަރ ސިޓީއަށް ބަދަލުވެ، މިސީޒަން ހުޅުވުމުގެ ގޮތުން ލިވަޕޫލްއާ ދެކޮޅަށް ކުޅުނު ޗެރިޓީ ޝީލްޑް މެޗުގައި ހާލަންޑަށް ލަނޑެއް ކާމިޔާބު ނުކުރެވުމުން ފުޓްބޯޅައިގެ ބައެއް ތަޖުރިބާކާރުންނާއި ނޫސްތަކުން އޭނާގެ ފެންވަރާމެދު އުފެއްދި ސުވާލުތަކަށް ޖަވާބު ދިނީ ޖެހިގެން އައި 12 މެޗުގައި 20 ލަނޑު ޖަހައިގެންނެވެ.
ހާލަންޑުގެ ފެންވަރާމެދު ފުރަތަމަ ދުވަހުން ފެށިގެންވެސް ޝައްކުގެ ނަޒަރުން ނުބަލައި ހުރި އެއްކުޅުންތެރިޔަކީ ލިވަޕޫލްގެ ތަޖުރިބާކާރު ޑިފެންޑަރު ވާޖިލް ވެންޑައިކެވެ.
ލީގުގައި މާދަމާ ރޭ އަމިއްލަ ދަނޑުގައި މެންޗެސްޓަރ ސިޓީއާ ކުރިމަތިލާން ޖެހޭއިރު ހާލަންޑް ހިފެހެއްޓުމުގެ އެންމެ ބޮޑު ޒިއްމާއެއް ހަވާލުވާނެ ކުޅުންތެރިޔަކަށް ވާނީވެސް ވެންޑައިކެވެ. ވެންޑައިކް ބުނީ ހާލަންޑް ހިފެހެއްޓުމަށް ހާއްސަ ޕްލޭނެއް އެބައޮތް ކަމަށާއި އެކަމަކު އެކަން ކުރެވޭނީ ޓީމެއްގެ ގޮތުގައި ކަމަށެވެ.
"ފުރަތަމަ ކުރިމަތިލުމުގައި އޭނާ (ހާލަންޑް) ހިފެހެއްޓުމުގައި އަހަރެމެން ކާމިޔާބު ހޯދިން. އެމެޗަށްފަހު ހާލަންޑުގެ ފެންވަރާމެދު ސުވާލުތަކެއްވެސް އުފެއްދި. އެކަމަކު މިހާރު ހާލަންޑް އެވަނީ ފުރިހަމަ ޖަވާބެއް ފާޑުކިޔުންތަކަށް ދީފައި. އަހަރެން އޭރުވެސް ބުނިން ހާލަންޑަކީ ވިސްނުންތޫނު ތަފާތު ކުޅުންތެރިއެއް ކަމަށް. އޭނާގެ ލަނޑު ޖެހުމުގެ ތޫނުފިލިކަމުގެ ސަބަބުން، ލީގުގައި ކުޅޭ ހުރިހާ ޑިފެންޑަރުންނަށްވެސް އޭނާއަކީ ބޮޑު ނުރައްކަލަކަށްވާނެ ކަމަށް ބުނިން" ކޮމިނިއުނިޓީ ޝީލްޑް މެޗުގައި ހާލަންޑް ހިފަހައްޓައި ސިޓީ ބަލި ކުރި މެޗުގެ ހަނދާންތައް އާކުރަމުން ވެންޑައިކް ބުންޏެވެ.
"އަހަރެން އެކަނި ކުރިމަތިލައިގެން ހާލަންޑް ނުހިފެހެއްޓޭނެ. ޕްލޭނަކީ އޭނާއަށް ލިބޭ ސަޕްލައިތަކަށް އެންމެ މަތީ ލެވެލްގައި މަސައްކަތްކޮށް ސަޕްލައިތައް މެދުކަނޑާލުން. އެކަން ކުރެވޭނީ ޓީމެއްގެ ގޮތުގައި. އަހަރެން މިހެން ބުންޏަސް އެނގޭ ސިޓީގެ މެދުތެރިން ކުރިއަށް ކުޅޭ ބޯޅަތައް ހުއްޓުވުމަކީ ފަސޭހަ ކަމަކަށް ނުވާނެކަން. މިކުރިމަތިލަނީ ސިޓީގެ އެގާރަ ކުޅުންތެރިންނާއި ލިވަޕޫލްގެ އެގާރަ ކުޅުންތެރިން. އަހަރެން އެކަނި ހާލަންޑާ ކުރިމަތިލައިގެން އޭނާ ނުހިފެހެއްޓޭނެ" ހާލަންޑް މޭންމާކް ކޮށްގެން ހިފެހެއްޓުމުގެ ވިސްނުން ނުގެންގުޅޭކަމަށް ބުނަމުން ވެންޑައިކް ބުންޏެވެ.
ސިޓީ އާއި ލިވަޕޫލް ބައްދަލު ކުރާ މެޗް ފަށާނީ މާދަމާ ރޭ ރާއްޖޭ ގަޑިން 20:30 ގައެވެ.
