ލ. ގަމު ރީޖަނަލް ހޮސްޕިޓަލުގައި ސީޓީ ސްކޭންގެ ޚިދުމަތް މިއަދު ފަށައިފައެވެ. މި ޚިދުމަތް ފަށްޓަވައިދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ.
އެ ޚިދުމަތް އިފްތިތާހު ކޮށްދެއްވަމުން ރައީސް ވިދާޅުވީ އެއީ ސިއްޙީ ޚިދުމަތް ލާމަރުކަޒު ކުރުމުގެ ސިޔާސަތުގެ ދަށުން، ގަމު ރީޖަނަލް ހޮސްޕިޓަލް، ޓާޝަރީ ފެންވަރަށް ތަރައްޤީކުރުމުގެ ގޮތުން ފެށި ޚިދުމަތެއް ކަމަށެވެ.
"މިއަދު މި ފެށޭ ސީޓީ ސްކޭންގެ ޚިދުމަތަކީ، މި ހޮސްޕިޓަލް، ޓާޝަރީ ފެންވަރަށް ގެންދިޔުމަށް ކުރެވޭ މަސައްކަތުގެ ތެރެއިން އިތުރުކުރެވުނު މުހިންމު ޚިދުމަތެއް،" ރައީސް ވިދާޅުވިއެވެ. އޭގެ ސަބަބުން އެ ޚިދުމަތް ހޯދަން މާލެއަށް ނުގޮސް، ރަށުގައި ތިބެގެން ނުވަތަ ލ. އަތޮޅުން ޚިދުމަތް ހޯދުމުގެ ފުރުޞަތު މިހާރުވަނީ ހުޅުވިފައި ކަމަށް ރައީސް ވިދާޅުވިއެވެ.
"އޭގެ އިތުރުން، އޯ.ޕީ.ޑީއަށް އިތުރުކުރި ކޮޓަރިތައްވެސް މިހާރު އެހުރީ ނިމި ބޭނުންކުރަން ތައްޔާރުވެފައި. ޑިޖިޓަލް އެކްސްރޭއާއި، މެމޮގްރާމާއި، ދަތުގެ ފަރުވާއަށާއި، ފިޒިއޯތެރަޕީއަށް ބޭނުންވާ ސާމާނާއި، ލެބޯޓެރީ ސާމާނުވެސް މިހާރު އެހުރީ ހޮސްޕިޓަލަށް ގެނެވިފައި. އެ މެޝިންތައް އިންސްޓޯލްކޮށް، ވަރަށް އަވަހަށް ޚިދުމަތް ދޭން އިރާދަކުރެއްވިއްޔާ ފެށިގެންދާނެ،" ރައީސް ވިދާޅުވިއެވެ.
އެމަނިކުފާނު ވިދާޅުވީ ހޮސްޕިޓަލަށް ބޭނުންވާ ސްޕެޝަލައިޒްޑް ޑޮކްޓަރުންނާއި، ޞިއްޙީ ޚިދުމަތްތެރިން ހޯދުމުގެ މަސައްކަތް، ހެލްތު މިނިސްޓްރީގެ ފަރާތުން މިހާރު ގެންދަވަނީ ކުރައްވަމުން ކަމަށެވެ.
މިއިން ކޮންމެ ބަދަލަކާއެކު އުފެދިގެން އެ އަންނަނީ ވަޒީފާގެ އެތައް ފުރުޞަތެއް ކަމަށް އެމަނިކުފާނު ވިދާޅުވިއެވެ. އެ ދާއިރާއިން މަތީ ތަޢުލީމު ޙާޞިލުކުރަމުން ގެންދާ ދަރިވަރުން، ރަށާއި އަތޮޅުގައި ތިބެގެން ވަޒީފާ އަދާކުރުމުގެ ވަރަށް ތަނަވަސް ފުރުޞަތުތަކެއް އެ އާއެކުގައި އުފެދިގެންދާނެ ކަމަށް ވެސް ވިދާޅުވިއެވެ.
"ޞިއްޙީ ޚިދުމަތުގެ ފެންވަރު ރަނގަޅުކޮށް ލާމަރުކަޒު ކުރުމަށް، މީގެ ދެ އަހަރު ކުރިން ފެށިގެން ކުރަމުން މި އަންނަ މަސައްކަތްތަކަށް ރައްޔިތުންގެ އިތުބާރު ލިބި، އަތޮޅުތަކުގެ ހޮސްޕިޓަލްތަކުން ޚިދުމަތް ހޯދާ މީހުންގެ ޢަދަދު މިހާރުވަނީ ވަރަށް ބޮޑަށް އިތުރުވެފައި. އަދި ކޯވިޑް-19ގެ ބަލިމަޑުކަމާ ގުޅިގެން، މާލެ ފުރަބަންދުކުރަން ޖެހުމުން، ޚިދުމަތްތައް ލާމަރުކަޒު ކުރުމުގެ މުހިންމުކަން ފެނިއްޖެ. އަދި މިއީ ކޮންމެހެން ކުރަންޖެހިފައި އޮތް ކަމެއްކަމަށް އަޅުގަނޑުމެންނަށް މިވަނީ ގަބޫލުކުރެވިފައި،" ރައީސް ވިދާޅުވިއެވެ.
އެމަނިކުފާނު ވިދާޅުވީ "ސަރުކާރުގެ އަމާޒަކީ، ރައްޔިތުންނަށް ތަކުލީފަކަށްނުވެ، ރައްޔިތުންނާ ވީހާވެސް ގާތުން ފެންވަރު ރަނގަޅު ޞިއްޙީ ޚިދުމަތް ލިބޭނެގޮތްތައް ހޯދައިދިނުން. ގަމު ހޮސްޕިޓަލް ތަރައްޤީކުރުމުގެ މަޝްރޫޢުގައި ހިމެނޭ، އައު ޢިމާރާތުގެ މަސައްކަތް، އިރާދަކުރެއްވިއްޔާ އަންނަ އަހަރުގެ ތެރޭގައި ފެށޭނެ. އެ ޢިމާރާތް ނިމި، ޓާޝަރީ ފެންވަރަށް ޚިދުމަތް ދޭން ފެށުމާއެކު، މި ޞަރަޙައްދުގެ ޞިއްޙީ ޚިދުމަތަށް ބޮޑެތި ކުރިއެރުންތަކެއް ލިބިގެންދާނެ،" ކަމަށެވެ.
ސަރުކާރުން ޞިއްޙީ ޚިދުމަތްތައް އިތުރަށް ތަރައްޤީ ކުރުމުގެ ތެރޭގައި، ކެންސަރ ހޮސްޕިޓަލެއް ޤާއިމުކުރުމުގެ މަސައްކަތް އެބައޮތް ކަމަށް ވެސް ރައީސް ވިދާޅުވިއެވެ. އެ ހޮސްޕިޓަލް، އަޅާނީ ލ. އަތޮޅު ގަމުގައި ކަމަށް ވެސް ރައީސް ވިދާޅުވިއެވެ. އެއީ އިންޑިއާގެ އެހީގެ ދަށުގައި އަޅާ ހޮސްޕިޓަލެއްކަމަށް ވެސް ވިދާޅުވިއެވެ. އެ ކަމާބެހޭ ލިޔެކިޔުންތައް، މީގެ ދެ ދުވަސް ކުރިން ވާނީ އިންޑިއާ ސަރުކާރާ ހިއްސާކޮށްފައި ކަމަށް ވެސް ރައީސް ވިދާޅުވިއެވެ. "އިރާދަކުރެއްވިއްޔާ ލަސްތަކެއްނުވެ އެކަމާބެހޭ ނިންމުންތައް ނިންމި، މި ރަށުގައި އެ ހޮސްޕިޓަލް ޢަމަލީގޮތުން އެޅުމުގެ މަސައްކަތް، މި އަންނަ އަހަރުން ފެށިގެންދާނެ،" އެމަނިކުފާނު ވިދާޅުވިއެވެ.
