އިނގިރޭސިވިލާތުގެ މެންޗެސްޓާގައި ހުންނަ ޗައިނާ ކޮންސިއުލޭޓުގައި ޑިމޮކްރަސީއަށް ތާއީދުކުރާ ބަޔަކާ ދެކޮޅަށް ހިންގި އަނިޔާވެރިކަމުގައި ޔޫކޭގައި ހުންނަވާ ޗައިނާގެ އިސް ޑިޕްލޮމޭޓެއް ބައިވެރިވެ ވަޑައިގަތްކަމަށް ޔޫކޭގެ އެމްޕީއަކު ވިދާޅުވެއެވެ.
ކޮންޒަވޭޓިވް ޕާޓީގެ މެމްބަރު އެލީޝިއާ ކެއާންސް ވިދާޅުވީ ހޮންކޮންގުގެ ތާއީދުގައި ކެމްޕޭން ކުރާ މީހަކަށް ހުކުރު ދުވަހު ހަމަލާ ދީފައިވާ ކަމަށާއި އަދި އޭގެ ކުރިން މެންޗެސްޓާގައި ހުންނަ ބެއިޖިންގެ ކޮންސުލް ޖެނެރަލް ޒެންގް ޒިޔުއާން އެމީހުންގެ ޕޯސްޓަރުތައް ހަލާކު ކުރައްވާ މަންޒަރު ފެނިފައިވާ ކަމަށެވެ.
އޮންލައިންކޮށް އާންމުކޮށް ފެންނާން ހުރި ފޫޓޭޖްތަކުން ފެންނަ ގޮތުގައި ޗައިނާގެ ކޮމިއުނިސްޓް ޕާޓީގެ ހަރު މަސްއޫލުވެރިއެއްކަމަށްވާ ޒެންގް ވަނީ ހޮންގކޮންގއަށް ތާއީދުކޮށް މުޒާހަރާކުރި މީހުންގެ ޕޯސްޓަރެއް އެއްލާލައި މުޒާހަރާ ކުރި މީހެއްގެ އިސްތަށިގަނޑުގައި ދަމައިގަނެ އެމީހާ ކޮންސިއުލޭޓްގެ ގޯތިތެރެއަށް ވައްދައި އަނިޔާކޮށްފައި ކަމަށެވެ.
އިނގިރޭސި ގާޑިއަން ނޫހުން ވަނީ ބައެއް ހެކިންނާ ވާހަކަ ދައްކައިފައެވެ. އަދި ފެނިފައިވާ މަންޒަރުތަކުގައި، ކޮންސިއުލޭޓުން ނިކުތް ނުވަ މީހުންގެ ތެރޭގައި ހެލްމެޓެއް އަޅައިގެން ހުރި ދެ މީހަކާއި ވެސްޓެއް ލައިގެން ހުރި ދެމީހަކު ތިއްބެވެ. މިމީހުން ވަނީ މުޒާހަރާ ކުރާ މީހުންނާ ކުރިމަތިލާފައެވެ.
ޔޫކޭ ޕާލަމެންޓްގެ ޚާރިޖީ ކަންކަމާ ބެހޭ ކޮމިޓީގެ ޗެއާމަން ކެއާންސް ވިދާޅުވީ މިއަމަލަކީ ޑިމޮކްރަސީއަށް ތާއީދުކުރާ މުޒާހަރާތަކާ ދެކޮޅަށް ޗައިނާއިން އަމަލުކުރަމުންދާ ގޮތް ކަމަށެވެ. އަދި އެކަމުގައި ބައިވެރިވާ މީހުންގެ މައްޗަށް ދައުވާ ކުރުމަށް ނުވަތަ އިނގިރޭސިވިލާތުން ބޭރުކުރުމަށް އޭނާ ހުށަހެޅުއްވިއެވެ.
ޔޫކޭ ފޮރިން އޮފީހުން ވަނީ މިކަމާ މެދު ޖަވާބު ދާރީ ވުމަށް ޗައިނާ އެމްބަސީއަށް އަންގާފައެވެ. އަދި އެކަމާ މެދު އިންތިހާއަށް ކަން ބޮޑުވާ ކަމަށާއި މިއީ އިނގިރޭސި އާންމު ސަގާފަތާ ޚިލާފް އަމަލެއް ކަމަށެވެ.
އިނގިރޭސި ސަރުކާރުން ވަނީ ތަހްގީގަކާ ނުލައި އިތުރު ތަފްސީލު ނުދެވޭނެ ކަމަށް ބުނެފައެވެ.
