ވިނަރެސް މަޝްރޫއިން ފްލެޓު ގަނެފައިވާ ފަރާތްތަކަށް އެ އިމާރާތްތަކުން ކާރު ޕާކު ކުރާނެ ޖާގަ ދޫކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފިއެވެ.
އެޗްޑީސީން މިހެން ބުނީ އިއްޔެ އެ ކޯޕަރޭޝަނުން ކުރި އިއުލާނެއްގައެވެ.
އެ އިއުލާނުގައި އެޗްޑީސީން އިތުރަށް ބުނީ ޕާކު ކުރުމުގެ ޖާގަ ދޫކުރުމަށް ހަމަޖެހިފައި ވަނީ 2 މޮޑެލެއްގެ ދަށުން ކަމަށެވެ. އެގޮތުން އިމާރާތުގެ ތެރެއިން، ކާރު ރެޖިސްޓްރީ ކުރުމުގެ ހުއްދަ އާއެކު 76 ޖާގަ އަދި އިމާރާތުގެ ބޭރުން ހަމައެކަނި ޕާކު ކުރުމުގެ ބޭނުމަށް 78 ޕާކިން ޖާގަ ދޫކުރުމަށް އެ ކޯޕަރޭޝަނުން ވަނީ ނިންމާފައެވެ.
ޕާކިން ޖާގައަށް އެދި ހުށަހެޅުމުގެ ޝަރުތުތައް:
- ފްލެޓު ގަތުމުގެ އެެއްބަސްވުމުގައި ސޮއިކޮށްފައިވާ މައި-އެޕްލިކެންޓް ކަމުގައިވުން
- ޑިސެމްބަރު މަހުގެ 5 ވަނަ ދުވަހުގެ ނިޔަލަށް އެއްވެސް ފައިސާއެއް ދައްކަން ޖެހި، އެ ފައިސާ ނުދައްކާވާ ފަރާތަކަށްނުވުން- ފޯމް ހުށައަޅާ ފަރާތްތަކުގެ ނަންމަތީ އެ ކޯޕަރޭޝާނުން ބަލަހައްޓަމުންދާ އެއްވެސް ތަނަކުން ގަނެފައި ނުވަތަ ކުއްޔަށް ނަގައިފައިވާ ތަންތަން - މި މުއްދަތު ތެރޭ ޑިސެމްބަރު މަހު ކުލި ހިމެނޭ.
- ކޮންމެ ފަރާތަކަށް ދޫކުރާނީ 1 ޕާކިން ޖާގަ
- ޕާކިން ޖާގައަކީ ފްލެޓު ގަތުމުގެ އެއްބަސްވުމުގެ ދަށުން ދޫކުރާ ޖާގައެއްގެ ގޮތުގައި ހަމަޖެއްސޭނެ
މީގެއިތުރުން އިމާރާތުގެ ތެރެއިން ބީލަމުގެ އުސޫލުން ދޫކުރާ ޖާގަ ގަންނަ ފަރާތަކަށް އެ ޖާގައިގައި ކާރު ރަޖިސްޓްރީ ކުރުމުގެ ހުއްދަ ދޫކުރެވޭނެ ކަމަށްވެސް އެޗްޑީސީން ބުންޏެވެއެވެ. އެގޮތުން ބީލަމުގެ އުސޫލުން ޖާގަތައް ވިއްކާއިރު، ބީލަން ފެށޭ އަގަކީ 650،000 ރުފިޔާއެވެ. އަދި ބީލަން ކާމިޔާބުކުރާ ފަރާތަކަށް ޕާކިން ޖާގައިގެ ޖުމްލަ އަގު ދެއްކުމަށް 30 ދުވަހުގެ މުއްދަތެއް ދެވޭނެ ކަމަށްވެސް އެ ކޯޕަރޭޝަނުން ވަނީ ބުނެފައެވެ.
ހަމައެއާއެކު އިމާރާތުގެ ބޭރުން ޕާކު ކުރުމުގެ ބޭނުމަށް ޖާގަ ކުއްޔަށް ދޫކުރާނީ 5 އަހަރު ދުވަހުގެ މުއްދަތަކަށް ކަމަށާއި ބީލަން ފެށޭ އަގެއް ކަމުގައި މަހު ކުލީގެ ގޮތުގައި އެޗްޑީސީން ކަނޑައަޅާފައި ވަނީ 2،000 ރުފިޔާ ކަމަށްވެސް ބުންޏެވެ. އަދި ސެކިއުރިޓީ ޑިޕޮސިޓުގެ ގޮތުގައި 3 މަހުގެ ކުއްޔަށްވާ ފައިސާ ދައްކަން 7 ދުވަހުގެ މުއްދަތެއް ދިނުމުގެ އިތުރުން ޕާކިން ޖާގަ ދޫކުރާނީ ހަމައެކަނި ކާރު ޕާކު ކުރުމުގެ ބޭނުމަށާއި އަދި ޖާގަތަކުގައި ކާރު ރެޖިސްޓްރީ ކުރުމުގެ ހުއްދަ ނުދެވޭނެ ކަމުގައި އެ ކޯޕަރޭޝަނުން ނެރުނު އިއުލާނުގައި ބުނެފައިވެއެވެ.
އަދި މި ޖާގަތައް ގަތުމަށް ނުވަތަ ކުއްޔަށް ހިފުމަށް ޝައުގުވެރިވާ ފަރާތްތަކުން އެކަމަށް އެދި https://bids.hdc..mv ހުށަހެޅުމުގެ ފުރުސަތު އަންނަ މަހުގެ 5 ވަނަ ދުވަހުގެ ނިޔަލަށް ވަނީ އެ ކޯޕަރޭޝަނުން ވަނީ ހުޅުވާލާފައެވެ.
