ޕާކިސްތާންގެ ޚުއްރަމް ގަބީލާ ޑިސްޓްރިކްޓްގައި ހިނގަމުންދާ ހަމަނުޖެހުންތަކުގައި މިހާތަނަށް 73 މީހުން މަރުވެއްޖެއެވެ. މަސްއޫލުވރިން ވިދާޅުވާ ގޮތުގައި ދޭތެރޭ ދޭތެރޭން ސުންނީންނާއި ޝީއީ ގަބީލާތަކުން އަދިވެސް ދަނީ ބަޑި ޖަހަމުން ހަމަލަތައް ބަދަލު ކުރަމުންނެވެ.
ޚުއްރަމް ގައި ރޭވެސް ބަޑިޖަހައި އެކަކު މަރުވެ، ހަތަރު މީހަކު ޒަޚަމްވެފައި ވެއެވެ. ބަޑި ޖެހުމުގެ އިތުރުން ހުޅު ޖެހުމުގެ ހާދިސާތައްވެސް ވަނީ އާންމު ކަމަކަށް ވެފައެވެ.
އަފްޣާނިސްތާނާއި ޕާކިސްތާނާއި އިންވާ ހިސާބުގައި އޮންނަ މި ގަބީލާ ސަރަހައްދަކީ ބިމުގެ މިލްކުވެރިކަމުގެ މައްސަލަ ބޮޑު ސަރަހައްދެކެވެ. ދެފަރާތުގެ ގަބީލާ ބޮޑުން ވަނީ ބައްދަލުކޮށް ހަފްތާއަކަށް ހަމަލަތައް ހުއްޓާލުމަށް އެއްބަސްވެފައެވެ. ނަމަވެސް އެކަން އަދި ތަންފީޒުވި ހެނެއް ހިއެއް ނުވެއެވެ.
ބުރާސްފަތި ދުވަހު ފެށުނު ހަމަނުޖެހުންތައް ހިނގާފައިވަނީ ލޯވަރ ޚުއްރަމްގައި ފަސިންޖަރުން ދަތުރުކުރި އުޅަނދުތަކަށް ހަމަލާދީ 39 މީހުން މަރާލުމާ ގުޅިގެންނެވެ.
ބުރާސްފަތި ދުވަހުގެ ހަމަލާއަށްފަހު މަރުވި މީހުންގެ އަދަދު އިތުރުވެފައިވަނީ ސީރިއަސް ޒަޚަމްތަކެއް ލިބިފައިވާ ފަރާތްތަކެއް މަރުވުމާ ގުޅިގެންނެވެ.
ހަމަލާއަށް ފަހު މާގިނަ އިރުތަކެއް ނުވެ ޚައިބަރު ޕަޚުތޫން ޚުވާގެ ޗީފް މިނިސްޓަރު އަލީ އަމީން ޚާން ގަންދަޕޫރު ވަނީ އިސް މަސްއޫލުވެރިންގެ ވަފްދެއް ސަރަހައްދަށް ފޮނުއްވާފައެވެ.
