ޓައިވާނާ މެދު ގޮތެއް ނިންމާނީ ޗައިނާ ރައްޔިތުން ކަމަށް ކޮމިއުނިސްޓް ޕާޓީގެ 20 ވަނަ ކޮންގްރެސްގައި ވާހަކަ ދައްކަވަމުން ޗައިނާ ރައީސް ޝީ ޖިންޕިން ވިދާޅުވިއެވެ. ނަމަވެސް އޭނާގެ ވެރިކަމުގެ ތިންވަނަ ދައުރުގައި ޗައިނާގެ 1.4 ބިލިއަން ރައްޔިތުން ހަނގުރާމައަކާ ކުރިމަތިލާން ޖެހިދާނެ ކަމަށް މުހައްލިލުން ބުނެއެވެ.
އެމެރިކާގެ ޚާރިޖީ ވަޒީރު އެންތޮނީ ބްލިންކެން ވިދާޅުވާ ގޮތުގައި ޗައިނާއިން ޓައިވާން ހިފުމަށް ކުރާ މަސައްކަތް ކުރިން ހީކުރި ވަރަށް ވުރެ "މާ އަވަސް ޓައިމްލައިނެއްގެ ދަށުން" ކުރިއަށް ގެންދާނެ އެވެ. ބްލިންކެން މިފަދައިން ވިދާޅުވީ ބޭނުން ނަމަ ގަދަކަމުން ޓައިވާން ޖަޒީރާ ހިފިދާނެ ކަމުގެ ވިސްނުން ޗައިނާ ލީޑަރު ތަކުރާރު ކުރެއްވިތާ މާގިނަ ދުވަހެއް ނުވެ އެވެ.
ކެލިފޯނިއާގެ ސްޓެންފޯޑް ޔުނިވާސިޓީގައި ހޯމަ ދުވަހު ބޭއްވި އިވެންޓެއްގައި މިސްޓަރ ބްލިންކެން ވިދާޅުވީ "ފާއިތުވި އަހަރުތަކުގައި ބެއިޖިން އިން ޓައިވާނާ މެދު ގެންގުޅޭ އުސޫލަށް ބަދަލެއް އައިސްފައިވާ،" ކަމަށެވެ.
ޗައިނާ ރައީސް 20 ވަނަ ކޮންގްރެސްގައި ވާހަކަ ދައްކަވަމުން ވިދާޅުވީ ސުލްހަވެރި ގޮތްތަކަށް ޗައިނާއިން އިސްކަންދޭ އިރު، ޓައިވާން ޗައިނާގެ ދަށަށް ގެނައުމަށް އަޅަންޖެހޭ ހުރިހާ ފިޔަވަޅެއް އެޅުމުގެ އިޚްތިޔާރު ޗައިނާއަށް ލިބިގެންވާ ކަމަށެވެ.
ބްލިންކެން ވިދާޅުވީ ޗައިނާގެ ލީޑަރުގެ ވާހަކަތަކުން އެނގެނީ މިހާރު އޮތް ހާލަތަކީ ޗައިނާއިން ބަލައި ގަންނާނެ ހާލަތެއް ނޫން ކަމަށެވެ.
އެމެރިކާގެ ރައީސް ޖޯ ބައިޑެން ވަނީ ޓައިވާނަށް ނުރައްކަލެއް ކުރިމަތި ވެއްޖެނަމަ އެމެރިކާއިން ޓައިވާން ދިފާއު ކޮށްދޭން ވައުދުވެ ވަޑައިގެންފައެވެ.
