ކުރިއަށް އޮތް ނޮވެމްބަރު މަހުގެ 20 ވަނަ ދުވަހު ގަތަރުގައި ފަށާ ފީފާ ވޯލްޑް ކަޕުގެ މެޗުތައް ދެއްކުމަށް ދައުލަތުގެ މީޑިއާ ކުންފުނި، ޕީއެސްއެމުން މީޑިއާ ނެޓާ އެކު ސޮއި ކޮށް، ދައުލަތުގެ ޓީވީ، ޓީވީއެމްއިން މިފަހަރުވެސް ވޯލްޑް ދައްކާނެ ކަމުގެ ޔަގީންކަން ދީފިއެވެ.
ރާއްޖޭގައި ވޯލްޑް ކަޕް ދެއްކުމުގެ ރައިޓްސް ގަނެފައިވާ މީޑިޔާ ނެޓުން 1 މިލިޔަން ޑޮލަރަށް ގަނެ، ރާއްޖެ ޓީވީ އަށާއި އައިސް ޓީވީއަށް މީގެ ކުރިން ވަނީ ވިއްކާފައެވެ.
މީޑިއާ ނެޓުން ޕީއެސްއެމްއަށް ވޯލްޑް ކަޕް ދެއްކުމުގެ ރައިޓްސް ވިއްކާފައިވަނީ 333،333 ޑޮލަރު (5.1 މިލިއަން ރުފިޔާ) އަށެވެ. ރާއްޖެ ޓީވީ އަށާއި އައިސް ޓީވީއަށްވެސް ރައިސްޓް ވިއްކާފައި ވަނީ ޕީއެސްއެމްއަށް ވިއްކި އަގަށްކަން ފާހަގަ ކޮށްލެވެއެވެ. މާނައަކީ މީޑިޔާ ނެޓުން ވޯލްޑް ކަޕުގެ ރައިޓްސް ގަތުމަށް ކުރި ޚަރަދު މިހާރު އެކުންފުންޏަށް މިހާރު މިވަނީ ލިބިފައެވެ.
ޓީވީއެމްއިން މިފަހަރު ވޯލްޑް ކަޕް ޝޯވްތައް ގެނެސްދިނުމަށް ތައްޔާރު ވަމުން ދަނީ ކުރީގެ އެންމެ މަޝްހޫރު ދެއެނަލިސްޓުން ކަމުގައިވާ އިމާދު ލަތީފާއި މުހައްމަދު ޝާހިދު ހިމަނައިގެންނެވެ. މިއީ ޓީވީއެމްގެ ވޯލްޑް ކަޕް ޝޯވްތަކަށް ލިބިގެންދާނެ އިތުރު ފުރިހަމަ ކަމަކަށް ވެގެންދާނެއެވެ.
ދިވެހިންނަށް އެންމެ ފުރަތަމަ ވޯލްޑް ކަޕް ފެނުނީ 1986 ގައި ޓީވީއެމް މެދުވެރިކޮށެވެ. ޑިއޭގޯ މަރަޑޯނާގެ ޖާދުވީ މޮޅު ކުޅުމާއެކު އާޖެންޓީނާއިން އެފަހަރު ތަށި އުފުލާލީ މަންޒަރު އޭރު ދިވެހިންނަށް ފެނުނެވެ. އޭގެ ފަހުން ކުޅުނު ކޮންމެ ވޯލްޑް ކަޕެއް ޓީވީއެމްއިން ދެއްކިއެވެ.
ވޯލްޑް ކަޕުގެ ދުވަސްވަރު ދިވެހިންގެ އެންމެ ބޮޑު ހަނދާނަކަށްވެސް ވެފައި އޮންނަނީ ޓީވީއެމްއިން ގެނެސްދޭ "ދަނޑު ފޯރި" ޕްރޮގްރާމެވެ.
