އިންޑިއާގެ ސިފައިން ވަނީ ޑްރޯން ހަނގުރާމައިގެ ހަމަލާތަކުން ސަލާމަތްވުމަށް މަތިން އުދުހޭ ޑްރޯންތައް ހޯދުމުގެ އައު މަޝްރޫއެއް ފަށާފައެވެ. އޭގެ އިތުރުން ދުޝްމަނުންގެ ސަފުތަކުގެ ފަހަތަށް ޑްރޯންތައް ފޮނުވައިގެން ސިއްރު މިޝަންތައް ހިންގުމަށްވެސް އައު ޑްރޯންތައް ގަތުމަށްވެސް ސިފައިން ވަނީ މަސައްކަތް ފަށާފައެވެ.
އިންޑިއާއިން ވަނީ ޑްރޯންއިން ދިފާއު ވުމަށް ސިފައިންގެ އައު ޔުނިޓެއްވެސް އުފައްދާފައެވެ. އެލައިޓް ޕެރަ ސްޕެޝަލް ފޯސަސް އިން ދަނީ ރިމޯޓުން ކޮންޓްރޯލު ކުރާ 750 މިނީ ޕައިލެޓް އެރިއަލް ވެހިކަލް (އާރުޕީއޭވީ) ގަތުމަށް މަސައްކަތް ކުރަމުންނެވެ.
އިންޑިއާ ސިފައިން ބުނިގޮތުގައި ޗައިނާއާ އެކު އުތުރުގެ ބޯޑަރުތަކުގައި މިހާރު އޮތް ހާލަތު ގޯސްވުމުން އާރުޕީއޭވީތައް އަވަހަށް ހޯދަން ޖެހެއެވެ.
މި އައު ޖީލުގެ ޑްރޯންތަކަކީ 30 މިނެޓަށް މަތީގައި އުދުހުމުގެ ގާބިލްކަން ލިބިފައިވާ އޭގެ ބަރުދަން ދެ ކިލޯއަށް ވުރެން ބަރު ނުވާ ވައްތަރުގެ ޑްރޯންތަކެވެ. އަދި އެއީ ދުވާލާއި ރޭގަނޑު ސަރވޭލަންސް ފޯރުކޮށްދިނުމަށް ވަރުގަދަ ހަތިޔާރަކަށް ވާނެ ކަމަށްވެސް ސިފައިން ބުނެއެވެ.
3ޑީ އިމޭޖުގެ ގޮތުގައި ސަރަހައްދުތައް ސްކޭން ކޮށްދީ ދުވާލާއި ރޭގަނޑު ތަމަލް ކެމެރާތައް މެދުވެރިކޮށް މަންޒަރުތައް ނެގުމާއެކު އެއީ "ހައި ވެލިއު ޓާގެޓްތައް" ނައްތާލުމަށް ސިފައިންނަށް އެހީތެރި ވެދޭނެ އުޅަނދެއް ކަމަށްވެސް އިންޑިއާ ސިފައިން ބުނެއެވެ.
ޑްރޯން ވަނީ ހަނގުރާމަތަކުގައި މުހިންމު ދައުރެއް އަދާކުރާން ފަށާފައެވެ. އެގޮތުން އަރްމީނިއާއާ އަޒަރުބައިޖާނުގެ ހަމަނުޖެހުންތަކާއި ރަޝިޔާއާ ޔޫކްރޭންގެ ހަމަނުޖެހުންތަކުގައި ޑްރޯނުން މުހިންމު ދައުރެއް އަދާ ކުރެއެވެ.
