ރާއްޖޭގެ ބައެއް ސަރަހައްދުތަކަށް މިއަދުވެސް މޫސުން ގޯސްކަމަށް ލަފާކޮށް މޫސުމާ ބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސް (މެޓް)އިން އިލްތިމާސް ކޮށްފިއެެވެ.
އެގޮތުން މެދުރާއްޖެތެރެއާއި އެކި ހިސާބުތަކަށް ވިއްސާރަކުރުމާއެކު ގުގުރާނެ ކަމަށާއި މީގެތެރެއިން ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށްވެސް މެޓުން ލަފާކޮށްފައިވެއެވެ. އަދި އުތުރުގެ ބައެއް ރަށްތަކަށް ކެރީގެ އަސަރާއެކު ގުގުރުން އެކަށީގެންވާ ކަމަށްވެސް އެ އިދާރާއިން ބުންޏެވެ.
އަދި ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 10 މޭލައި 20 މޭލާ ދެމެދުގެ ބާރުމިނުގައި އަދި އެހެން އަތޮޅުތަކަަށް ހުޅަނގުއުތުރާއި އުތުރުން ގަޑިއަކު 7 މޭލައި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށްވެސް މެޓުން ބުނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައިގަދަވުން އެކަށީގެންވާ ކަމަށްވެސް މެޓުން ލަފާކުރެއެވެ.
މީގެއިތުރުން މެޓުން ބުނީ ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް ގަދަވާނެ ކަމަށާއި އެހެން ހިސާބުތަކުގެ ކަނޑުތައް އާދައިގެ ވަރަކަށް މަޑުވިޔަސް ވިލާގަނޑުގައި ގަދަވާނެކަމަށެވެ.
އިއްޔެގެ ވަގުތެއްގައި މެޓުން ވަނީ ރާއްޖޭގެ އިރުން، ބޭ އޮފް ބޭންގަލް އަދި ރާއްޖޭގެ އިރުދެކުނުގައި އުފެދިފައިވާ ދެ ކޮޅިގަނޑުގެ ސަބަބުން އަންނަ ބުދަ ދުވަހުން ފެށިގެން، ކުރިއަށް އޮތް 5 ދުވަހު ރާއްޖޭގެ އާއްމު، ވައިބާރު ވާނެކަމަށްވެސް ލަފާކޮށް ބަޔާނެއް ނެރެފައެެވެ.
އެ ބަޔާނުގައި ބުނީ ރާއްޖޭގެ އިރުން ބޭ އޮފް ބޭންގަލްގައި އުފެދިފައިވާ ކޮޅިގަނޑު ކުރިއަށް އޮތް 24 ގަޑިއިރުގެ ތެރޭގައި އިތުރަށް ބާރުގަދަވެ، ބާރުގަދަ ކޮޅިގަނޑަކަށް ބަދަލުވާނެ ކަމަށް ބެލެވޭ ކަމަށެވެ.
މި ކޮޅިގަނޑު ދަތުރު ކުރަމުންދާނެ ކަމަށް ބެލެވެނީ ހުޅަނގުއުތުރަށް އިންޑިއާގެ ޓެމިލްނާޑް-ސްރީ ލަންކާގެ އައްސޭރިފަށާ ދިމާލަށް ކަމަށާއި މި ކޮޅުގަނޑުގެ އިތުުރުން ރާއްޖެ އާ ދުރުން، ރާއްޖޭގެ އިރުދެކުނުގައި އިތުުރު ކޮޅިގަނޑެއް އުފެދިފައިވާ ކަމަށްވެސް މެޓުން ބުންޏެވެ.
މޫސުން ގޯސްވާނެ ކަމަށް ލަފާކުރެވޭތީ ހުރިހާ ފަރާތްތަކުން އަދި ހާއްސަކޮށް ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް މެޓް ވަނީ އިލްތިމާސްކޮށްފައެވެ.
.
