އިންޑިއާގައި ބޭނުންކުރާ މޯބައިލް ފޯނުތަކުގެ 97 ޕަސެންޓަށް ވުރެ ގިނައީ އިންޑިއާގައި އަމިއްލައަށް އުފައްދާފައިވާ ފޯނުތަކެވެ. އޮބްޒާވަރ ރިސާޗް ފައުންޑޭޝަން (އޯއާރްއެފް) އިން އިންތިޒާމްކޮށްގެން ކުރިއަށް ގެންދިޔަ ސައިބާ ކޮމިއުނިކޭޝަންއާ ބެހޭ ސައިއެފްވައި2022 ބއްދަލުވުމުގައި ވާހަކަފުޅު ދައްކަވަމުން އިންޑިއާގެ މިނިސްޓަރ އޮފް ސްޓޭޓް ފޯ އިލެކްޓްރޯނިކްސް އެންޑް އިންފޮމޭޝަން ޓެކްނޮލޮޖީ ރާޖީވް ޗަންދްރަސޭކަރް ވިދާޅުވިއެވެ.
އޭނާ ވިދާޅުވީ 2014 ވަނަ އަހަރު އިންޑިއާގައި ބޭނުންކުރި 92 ޕަސެންޓަށް ވުރެ ގިނަ މޯބައިލް ފޯނަކީ އެތެރެ ކޮށްފައިވާ ފޯނުތައް ކަމަށެވެ. އަދި އެއިރާ ބަލާއިރު މިއަދު އިންޑިއާއިން 12 ބިލިއަން ޑޮލަރުގެ މޮބައިލް ފޯނު އެކްސްޕޯޓް ކުރާކަމަށްވެސް ވިދާޅުވިއެވެ.
އޭނާ ވިދާޅުވީ ޕްރައިވެސީގެ ހައްގާއި ޑޭޓާ ޕްރޮޓެކްޝަން އަކީ އިންޑިއާގައި އަސާސީ ހައްގުތަކެއް ކަމަށާއި އެ ހައްގުތައް ދެނެގަނެ އެ ހައްގުތައް ކަށަވަރުކުރުމުގައި ޑޭޓާ ޕްރޮޓެކްޝަން ގެ ގާނޫނުން ބާރު ލިބިދޭނެ ކަމަށެވެ.
އިންޑިއާ ޕާލަމެންޓްގައި ޕާސަނަލް ޑޭޓާ ޕްރޮޓެކްޝަންގެ އާ ބިލް އަންނަ އަހަރުގެ ފެބްރުއަރީ މަހު ހުށަހެޅުމަށް ނިންމާފައި ވެއެވެ.
