ޓިބެޓުގެ ސަރަހައްދީ ވެރިރަށް ލާސާގައި ކޮވިޑް-19 ގެ ހަރުކަށި ފިޔަވަޅުތަކާ ދެކޮޅަށް މަދުން ނޫނީ ނުފެންނަ މުޒާހަރާތަކެއްގެ ވީޑިއޯތަކެއް ވަނީ މީސްމީޑިއާގައި ދައުރުވާން ފަށާފައެވެ.
ސޯޝަލް މީޑިއާގައި ގިނަ އަދަދެއްގެ ވީޑިއޯތަކުން ފެންނަނީ އެތައް ސަތޭކަ ބަޔަކު މުޒާހަރާކޮށް ފުލުހުންނާ ކުރިމަތިލާތަނެވެ. އެއިން ގިނަ މީހުންނަކީ ޗައިނާގެ ބައި ގިނަ ހޭން ޗައިނީޒް ދަރިކޮޅުގެ ހިޖުރަވެރި މަސައްކަތްތެރިން ކަމަށް މީހުން ބުނެއެވެ.
ކޮވިޑް-19 ގެ ރާޅަކާ ކުރިމަތިލާން ޖެހުމުން ލާސާ ލޮކްޑައުންގައި އޮންނަތާ ގާތްގަނޑަކަށް ތިން މަސް ވެއްޖެ އެވެ. ޓިބެޓަކީ ޗައިނާގެ އެންމެ މުހިންމު އެއް ސަރަހައްދެވެ. ބުދަ ދުވަހުގެ މެންދުރު ފަހު ފެށި މުޒާހަރާތައް ރޭގަނޑާ ހަމައަށް ކުރިއަށް ގެންދިޔަ ކަމަށް ބުނެ އެވެ.
އެއް ވީޑިއޯއިން ފެންނަ ގޮތުގައި އެތައް ސަތޭކަ ބަޔަކު މަގުމައްޗަށް އެއްވެފައި ތިބިއިރު، ލައުޑްސްޕީކަރެއްގައި މަޑުމައިތިރިވުމަށް ގޮވާލާ މެސެޖެއް އިވޭއިރު، އޮފިޝަލަކު ވަނީ މުޒާހަރާ ކުރާ މީހުން އެނބުރި ދިއުމަށް އެދިފަ އެވެ.
އަނެއް ވީޑިއޯއިން ފެންނަ ގޮތުގައި ރޭގަނޑު މަގުމަތީގައި އެތައް ސަތޭކަ ބަޔަކު އުޅޭއިރު، ސަރުކާރާ ދެކޮޅު ވާހަކަތަކެއް އިއްވާފައި ވެއެވެ. އަދިވެސް އެހެން ވީޑިއޯއެއްގައި "އަހަރެމެން ހަމައެކަނި ބޭނުންވަނީ ގެއަށް ދާން" ލިޔެފައިވާ ބޯޑު ޖަހައިގެން މަގުމަތީގައި ހިނގާލުންތަކެއް ހިނގާ މަންޒަރު ފެނުނެވެ.
އޭގެ ތެރެއިން ބައެއް ވީޑިއޯތަކަކީ ފާއިތުވި ދުވަސްތަކުގައި ޗައިނާގެ ސޯޝަލް މީޑިއާ އިން ފޮހެލާފައިވާ ވީޑިއޯތަކެވެ. ނަމަވެސް ޓްވިޓާގައި އަލުން ޕޯސްޓް ކޮށްފައި ވެއެވެ.
ޓިބެޓުގެ މަސްދަރުތަކުން ރޭޑިއޯ ފްރީ އޭޝިއާއަށް މައުލޫމާތު ދިން ގޮތުގައި މުޒާހަރާގެ ބައިވެރިން ވަނީ ފުލުހުންގެ މަގު ހުރަސްތައް ނުނަގައިފިނަމަ "އަލިފާން ރޯކުރާނެ" ކަމަށް އިންޒާރު ދީފައެވެ.
