އިންޑޯ-ޕެސިފިކް ސަރަހައްދު އަލުން ބައްޓަން ވެގެންދާއިރު އެކަން ކުރިއަށް ދަނީ ސްޓްރެޓެޖިކް ގޮތުންނާއި އިގްތިސާދީ ގޮތުން ވެސް ބެއިޖިން އަށް ކަމުނުދާ ގޮތަކަށެވެ.
ބާރުގަދަ ޑިމޮކްރަސީތައް ކަަމަށްވާ އެމެރިކާ، އިނގިރޭސިވިލާތް، ޖަޕާން، އޮސްޓްރޭލިއާ، އިންޑިއާ އަދި އެހެނިހެން ގައުމުތައް ގުޅިގެން ދަނީ ސުލްހަވެރި، ތަނަވަސް އަދި ގގާނޫނީ ހަމަތަކަށް ބިނާކޮށްފައިވާ އިންޑޯ-ޕެސިފިކް ސަރަހައްދެއް ކަށަވަރުކުރުމަށް މަސައްކަތް ކުރަމުންނެވެ.
އިންޑޯ ޕެސިފިކް ސަރަހައްދުގައި ޗައިނާގެ ރޭވުންތަކާ ދެކޮޅަށް އެމެރިކާއިން އޭޝިއާގައި އެއްބައިވަންތަ ކަން އާލާކުރުމަށް އެދިފައި ވެއެވެ.
ޖަޕާނުގެ ކަނޑުގެ ސިފައިންގެ މަރުކަޒެއްގައި އެމެރިކާގެ މަނަވަރެއްގައި އެމެރިކާގެ ނައިބު ރައީސް ކަމްލާ ހެރިސް ވަނީ ޓައިވާނުގެ ވަށައިގެން ޗައިނާ ސިފައިން އުދަގޫކުރާ ކަމަށް ވިދާޅުވެ ޗައިނާއަށް ސީދާ ގޮންޖައްސަވާފައެވެ. ހެރިސް ވިދާޅުވީ އެކަމުގެ ރައްދުގައި އެމެރިކާއިން ޓައިޕޭއާ އެކު އޮންނަ ނުރަސްމީ ގުޅުންތައް އިތުރަށް ވަރުގަދަ ކުރާނެ ކަމަށެވެ.
ޗައިނާގެ ރޭވުންތައް ހުއްޓުވުމަށާއި، ބޭނުން ނަމަ ޗައިނާއާ ކުރިމަތިލުމަށް އެމެރިކާގެ ސްޓްރެޓެޖީގެ މައިގަނޑު ބިނާވެފައި އޮތީ ދެކުނު ކޮރެއާއާއި ޖަޕާނާ ދެމެދު އޮތް އިއްތިހާދެއްގެ މައްޗަށެވެ. ދެކުނު ކޮރެއާ އާއި ޖަޕާނުން ވެސް މިހާރު ދަނީ ދެވަނަ ބޮޑު ހަނގުރާމައިގެ ސަބަބުން އެ ދެ ގައުމުގެ ބައިބައިވުންތައް ހައްލު ކުރުމަށް މަސައްކަތް ކުރަމުންނެވެ.
އެމެރިކާގެ ކުރީގެ ޑޮނަލްޑް ޓްރަމްޕްގެ ވެރިކަމުގައި ކޮށްފައިވާ މަސައްކަތުން ދެކުނު ކޮރެއާއާއި ޖަޕާނާއި އެމެރިކާއާ ދެމެދު ތިން ގައުމުން ގުޅިގެން ސަލާމަތީ އެއްބާރުލުމުގެ ބޮޑު ރަމްޒެއްގެ ގޮތުގައި ޓޯކިޔޯއާއެކު އަސްކަރީ ޖާސޫސީ މައުލޫމާތު ހިއްސާކުރުމުގެ އެއްބަސްވުމެއް ކުރިއަށް ގެންދިއުމަށް ދެކުނު ކޮރެއާއިން ވަނީ އެއްބަސްވެ ފައެވެ.
2019 ވަނަ އަހަރު ޖަޕާނުން ދެކުނު ކޮރެއާގެ ސެމީކޮންޑަކްޓަރ އިންޑަސްޓްރީއަށް މުހިންމު ކެމިކަލްތަކުގެ އެކްސްޕޯޓް ކޮންޓްރޯލް ދިން ނަމަވެސް ސޯލް އިން ކެމިކަލްތަކާއި މެޓީރިއަލްތަކުގެ މަސްދަރުތައް ކާމިޔާބުކަމާއެކު ޑައިވަރޓް ކުރުމުން ޖަޕާނުގެ އެކްސްޕޯޓް ކޮންޓްރޯލްގެ އަސަރު ދެކުނު ކޮރެއާގެ ސެމީކޮންޑަކްޓަރ އިންޑަސްޓްރީއަށް ކުޑަ ކަމަށް ތަޖުރިބާކާރުން ދެކެއެވެ.
ވޮޝިންޓަނުން ދަނީ އެކުވެރި ގައުމުތަކުގައި ކޮމްޕިއުޓަރ ޗިޕް އުފެއްދުން ފުޅާކުރުމާއި، ނާޒުކު ސަޕްލައި ޗޭންތައް ހަރުދަނާކުރުމާއި، ބެއިޖިންގެ ޓެކްނޮލޮޖީގެ އިންވެސްޓްމަންޓްތަކާ ދެކޮޅަށް މަސައްކަތް ކުރަމުންނެވެ. ޗައިނާގެ އިތުރު ވަމުން އަންނަ ބާރު ގަދަކަމާ ދެކޮޅަށް އިއްތިހާދުތައްހެދުމަށް ކުރާ މަސައްކަތުގައި އެމެރިކާގެ ސިޔާސަތުގެ ފޯކަސްއަކަށް ވެފައިވަނީ ޖަޕާނާއި ދެކުނު ކޮރެއާ އަދި އެމެރިކާއާ ދެމެދު ތިން ގައުމުގެ ގުޅުމެވެ.
ވަސީލަތްތައް ގިނަ އިންޑޯ ޕެސިފިކްގެ ކަނޑުގެ މަގުތަކުގެ ސަލާމަތަށް ނުރައްކާވާ ގޮތަށް ޗައިނާއިން އިތުރު ވަމުންދާ ގޮންޖެހުމާ ކުރިމަތިލުމަށްޓަކައި، އެމެރިކާއިން ވަނީ ފިލިޕީންސްއާ އެކު ސަލާމަތީ އެއްބާރުލުން ހަރުދަނާ ކުރުމަށް ވެސް މަސައްކަތް ފަށާފައެވެ. އެކަމުގައިވެސް ޖަޕާނުން ބައިވެރިވެއެވެ.
