ނެދަލެންޑްސްގެ ފޮރިން މިނިސްޓްރީން ބުނެފައިވަނީ ޗައިނާއިން ނެދަލެންޑްސްގައި ގަވާއިދާ ހިލާފަށް ދެ ޕޮލިސް ސްޓޭޝަނެއް ގާއިމްކޮށްފައިވާ ކަމަށް ބުނާ ރިޕޯޓްތައް ތަހުގީގު ކުރަމުން އަންނަ ކަމަށެވެ. އަދި އެކަމާ ބެހޭ އިތުރު މައުލޫމާތު ލިބުމުން އެކަށީގެންވާ ފިޔަވަޅު އެޅޭނެ ކަމުގައި ފޮރިން މިނިސްޓްރީގެ ތަރުޖަމާނު މެކްސިމް ހޮވެންކަމްޕް ވިދާޅުވި އެވެ.
ޗައިނާ ސަރުކާރުން ދުވަހަކުވެސް ޑިޕްލޮމެޓިކް ޗެނަލްތަކެއް މެދުވެރިކޮށް ޕޮލިސް ސްޓޭޝަންތަކެއް ހަދާފައިވާ ވާހަކަ ނެދަރލެންޑްސްގެ ސަރުކާރަށް އަންގާފައި ނުވެއެވެ. އަދި އެފަދަ ކަމެއް ކުރާނަމަ އެއީ ގާނޫނާ ހިލާފު ކަމެއް ކަމަށް ހޮވެންކަމްޕް ވިދާޅުވި އެވެ.
ޑަޗް ބްރޯޑްކާސްޓަރު އާރުޓީއެލް ނިއުސް އާއި އިންވެސްޓިގޭޓިވް ޖާނަލިޒަމް ޕްލެޓްފޯމް ފޮލޯ ދަ މަނީ އިން ޝާއިއުކުރި ރިޕޯޓެއްގައިވާ ގޮތުން އެ މަރުކަޒުތައް ބޭނުން ކޮށްގެން "ނެދަލެންޑްސްގައި ދިރިއުޅޭ ޗައިނާއާ ޚިޔާލުތަފާތުވާ ޗައިނާ މީހުންނަށް ޕްރެޝަރު ކުރުމަށް ބޭނުންކުރި ކަމުގެ ހެކިތައް" ލިބިފައި ވެއެވެ.
އެ ސެންޓަރުތަކަކީ ޗައިނާގެ ޑްރައިވިން ލައިސަންސް އާކުރުން ނުވަތަ ކައިވެނީގެ ހާލަތަށް ބަދަލު އަންނަކަން އެންގުމާއެކު ސަރުކާުރން ދޫކުރާ ޑޮކިއުމެންޓްތައް ފަދަ ރައްޔިތުންނަށް ހިދުމަތްތައް ދޭ މަރުކަޒުތައް ކަމަށް ރިޕޯޓުގައިވެ އެވެ.
ނެދަލެންޑްސްގައި ހިމާޔަތް ހޯދާފައިވާ ޗައިނާގެ ސަރުކާރާ ޚިޔާލުތަފާތުވާ މީހަކަށް ޗިޓް ފޮނުވާފައިވަނީ ނެދަލެންޑްސްގެ ދެވަނައަށް އެންމެ ބޮޑު ސިޓީ ރޮޓަޑަމްގައި ހުންނަ ޗައިނާގެ ޕޮލިސް އޮފީހުން ކަމަށް ރިޕޯޓްގައި ބުނެފައިވެއެވެ. އަދި ނޭނގޭ ނަންބަރަކުން އިންޒާރުދޭ ފޯންކޯލާއި ޓެކްސްޓް މެސެޖުތައް ލިބިފައިވާ ކަމަށް ވެސް ޗައިނާގެ ރައްޔިތު މީހާ ރިޕޯޓްކޮށްފައިވާއިރު، އޭނާގެ ނަމުގައި ބޮމުގެ އިންޒާރު ދީފައިވާ ކަމަށް ވެސް ބުނެފައިވެ އެވެ.
ރިޕޯޓުގައިވާ ގޮތުން ރޮޓަޑަމް ގައި ހުންނަ ޗައިނާ ޕޮލިސް ސެންޓަރަކީ ޝަންހާއީގެ ދެކުނުގައި އޮންނަ ޗައިނާގެ ޒެޖިއަންގް ޕްރޮވިންސްގެ ލިޝޫއީ ޕްރިފެކްޗާގެ ފުލުހުންގެ އިފީހެކެވެ.
އެމްސްޓަޑަމް ގައި ހުންނަ ޗައނާ ޕޮލިސް ސެންޓަރު ގުޅިފައިވަނީ ޗައިނާގެ ފުޖިއަން ޕްރޮވިންސްގައި އޮންނަ ފުޒޯ ސިޓީއާއެވެ.
މި ދެ ސަރަހައްދަކީ ޗައިނާއިން ޔޫރަޕަށް ހިޖުރަކުރާ މީހުން ގިނ ދެ ސަރަހައްދެވެ.
އާރުޓީއެލް ނިއުސް އާއި ފޮލޯ ދަ މަނީ އިން ބުނީ ޗައިނާގެ އެމްބަސީން ބުނެފައި ވަނީ ނެދަރލެންޑްސްގައި ދެ ފުލުހުންގެ މަރުކަޒު ހުރިކަން ނޭނގޭ ކަމަށެވެ
'ޗައިނާއިން ދިހަވަރަކަށް ގައުމުގައި އެފަދަ މަރުކަޒުތައް ހަދާފައި ވެއެވެ.
ސްޕެއިންގައި ހުންނަ އިންސާނީ ހައްގުތަކާ ބެހޭ އެންޖީއޯ ސޭފްގާޑް ޑިފެންޑަރސް އިން ސެޕްޓެމްބަރު މަހު ނެރުނު ރިޕޯޓެއްގައި ބުނެފައި ވަނީ އީޔޫގެ 12 ގައުމެއް ހިމެނޭ ގޮތަށް ދިހަވަރަކަށް ގައުމުގައި ބެއިޖިންއިން ފުލުހުންގެ "ސާވިސް ސްޓޭޝަންތައް" ގާއިމް ކޮށްފައިވާ ކަމަށެވެ.
މި ރިޕޯޓުގައި ތުހުމަތުކޮށްފައިވާ ގޮތުގައި މި ސްޓޭޝަންތަކުގެ ތެރެއިން އެއް ސްޓޭޝަން ހުންނަނީ ޖަރުމަނުގެ ފްރެންކްފަރޓްގައެވެ.
