ބުރާސްފަތި ދުވަހު 44 ބިލިއަން ޑޮލަރުގެ ވިޔަފާރި މުއާމަލާތް ނިންމުމަށް ފަހު އެލޮން މާސްކް ވަނީ ޓުއިޓާގެ ސިޔާސަތުތައް އިސްލާހު ކުރަން ފަށާފައި ކަމަށާއި މުވައްޒަފުން މަދުކޮށް ޓުއިޓާގެ ކޮންޓެންޓާ ބެހޭ ނިންމުންތައް ނިންމާ ކައުންސިލެއް އެކުލަވާލުމަށް މަސއްކަތް ކުރަމުން އަންނަ ކަމަށް ރިޕޯޓްކޮށްފައިވެ އެވެ.
ސޯޝަލް މީޑިއާ ޕްލެޓްފޯމް ގަނެ، ޑީލް ނިންމިތާ މާގިނައިރުތަކެއް ނުވެ ޓެސްލާގެ ސީއީއޯ ވަނީ އޭނާގެ ޓްވިޓާގައި "ލެޓް ދަ ގުޑް ޓައިމްސް ރޯލް" އޭ ކިޔާފައި ޓްވީޓެއް ކުރުމުން ސޯޝަލް މީޑިއާ ބޭނުން ކުރާ މީހުންގެ މެދުގައި އޭނާގެ ނިޔަތާ މެދު ޝައްކު އުފެދިފަ އެވެ.
މި ހަފްތާގެ ކުރީކޮޅު މަސްކް ޓްވިޓާގެ މައި އޮފީހަށް ވަޑައިގަތީ ސިންކެއް ހިފައިގެން ކަމަށާއި، އަދި އެ އިވެންޓް ޓްވިޓާގައި ޑޮކިއުމެންޓް ކުރައްވައި ވިދާޅުވީ "އެންޓަރިންގ ޓްވިޓާ އެޗްކިއު - ލެޓް ދަ ސިންކް އިން!" އަދި އޭނާގެ ޓްވިޓާ ޑިސްކްރިޕްޝަން "ޗީފް ޓްވިޓް" އަށް ވެސް އަޕްޑޭޓް ކުރި އެވެ.
ޓުއިޓާގެ ކޮންޓެންޓާ މެދު ގޮތެއް ނިންމުމާ ބެހޭ ޕޮލިސީތަކަށް ގެނައި ބަދަލުތަކާ ގުޅޭ ގޮތުން މާސްކް ކުރެއްވި ޓްވީޓެއްގައި ލިޔުއްވާފައިވާ ގޮތުގައި "ޓްވިޓަރ އިން އެކުލަވާލާނީ ފުޅާ ދާއިރާއެއްގައި ތަފާތު ފިކުރުގެ ކޮންޓެންޓް މޮޑެރޭޝަން ކުރެވޭ ވަރުގެ ކައުންސިލެއް. އެ ކައުންސިލް އެކުލަވާލުމުގެ ކުރިން ކޮންޓެންޓް މޮޑެރޭޝަން ކުރުމެއް ނޯންނާނެ" ކަމަށެވެ.
މަސްކު ކުންފުންޏާ ޙަވާލުވެގެން އެޅުއްވި ފުރަތަމަ ފިޔަވަޅުގައި އޭނާ ވަނީ ޓްވިޓާގެ ސީއީއޯ ޕަރަގް އަގްރަވާލް އާއި ފައިނޭންސް ޗީފް ނެޑް ސެގަލް ވަކި ކުރައްވާފައެވެ. އަދި ކުރީގެ ލީޑަޝިޕްގެ ދަށުން މަނާކޮށްފައިވާ އެކައުންޓްތަކުގެ ހާލަތަށް އިތުރު ބަދަލުތަކެއް އޭނާގެ ލީޑަޝިޕްގެ ކުރީކޮޅު ގެންނަން ޖެހޭނެ ކަމަށް ވެސް ވިދާޅުވެފައި ވެއެވެ.
