ޕޯލް ހެންރީ ނާރގޯލެޓް ވަނީ ޓައިޓެނިކް ޣަރަގުވި ސަރަހައްދަށް އެތައް ފަހަރަކު ފީނާފައެވެ. ޖުމްލަ 30 ފަހަރަށް ވުރެ ގިނަ ފަހަރު އެ ހިސާބަށް އޭނާ ފީނާފައި ވެއެވެ.
އެއިން އެއް ޑައިވެއްގައި، 1998 ވަނަ އަހަރު، ޓައިޓެނިކު ޣަރަގުވި ސަރަހައްދު ކައިރީގައި ގޮތް ނޭނގޭ އަޑުތަކެއް އޭނާ ރެކޯޑް ކުރިއެވެ. އޭގެ ފަހުން އައި ދިހަވަރަކަށް އަހަރުގެ ތެރޭގައި، އެ އަޑު އަންނަނީ ކޮންތާކުކަން ހޯދުމަށް އޭނާ މަސައްކަތް ކުރިއެވެ.
އޭނާ ލަފާ ކުރި ގޮތުގައި އެއީ އެތަނަށް ޣަރަގުވެފައިވާ އެހެން ބޯޓަކުން އުފެދޭ އަޑެއްކަމަށްވެސް ވެދާނެއެވެ. ނުވަތަ އެހިސާބުގެ ތަފާތު ބާވަތެއްގެ ކަނޑުގެ ދިރުމެއްގެ އަޑުތަކެއް ކަމުގައިވެސް ވެދާނެއެވެ.
މިހާރު 2022 ވަނަ އަހަރު އެންމެ ފަހުން އޭނާއަށް ސިއްރު ވަނީ ހޯދައި ގަނެވިފައެވެ.
މިއަހަރުގެ ކުރީކޮޅު ޓައިޓެނިކް ބޯޓު އަޑިއަށްދިޔަ ސަރަހައްދުގެ އެކްސްޕެޑިޝަނެއްގައި ނާރގޯލެޓް އާއި އޭނާގެ އެކުވެރިންނަށް ކަނޑުގެ ދިރުންތަކުން ފުރިފައިވާ އުސް ފަރުބަދައެއް ޑޮކިއުމެންޓް ކުރެވުނެވެ.
މިއީ ބެސަލްޓުން ފުރިގެންވާ އަލަށް ހޯދުނު ކަނޑުގެ އަޑީގެ ފަރުބަދައެކެވެ. މި ދިރާސާވެރިން ވަނީ ވަގުތީ ގޮތުން އެ ފަރުބަދައަށް ނާގޮލެޓް-ފަނިން ރިޖްގެ ނަމން ނަން ދީފައެވެ.
9514 ފޫޓު އަޑިން ފެނުނު އެ ފަރުބަދަ މަތީގައި ސްޕޮންޖާއި، މުރަކައާއި، މަހާއި، ލޮބްސްޓަރާއި، އަދިވެސް ތަފާތު އެތައް ދިރުމެއް ފެނިފައި ވެއެވެ.
ސައިންވެރިން ބުނާ ގޮތުން ފުން މާ ކަނޑުގެ ދިރުން ދިރާސާ ކުރުމަށް މި ހޯދުން މުހިންމު ހިއްސާއަކަށްވާނެ ކަމަށެވެ.
