އިނގިރޭސިވިލާތުގެ “ފައިނޭންޝަލް ޓައިމްސް” އިން ބުނާ ގޮތުގައި ޗައިނާގެ ރައީސް ޝީގެ ތިން ވަނަ ދައުރާއެކު އެގައުމުން ބޭރުވާން ބޭނުންވާ ޗައިނާގެ މުއްސދަނދިންގެ އަދަދު ދަނީ އިތުރު ވަމުންނެވެ.
އެނޫހުގެ ރިޕޯޓުގައިވާ ގޮތުން އިމިގްރޭޝަންގެ ކަންކަން ބަލަހައްޓައިދޭ ޔޫކޭގެ ގާނޫނީ ވަކީލަކު ބުނި ގޮތުގައި މުއްސަނދި ޗައިނާ އާއިލާތަކެއް ފިލައިގެން ދިއުމުގެ ޕްލޭން ތަންފީޒު ކޮށް ދިނުމަށް އެދިފައި ވެއެވެ. އެއީ ވަރަށް މުއްސަނދި ހަތް އާއިލާއެއް ކަމަށް ބުނެފައި ވެއެވެ.
އެ ނޫހުން ބުނާ ގޮތުން ޝަންހާއީ އާއި ބެއިޖިންގެ އިމިގްރޭޝަން ކުންފުނިތައް މެދުވެރިކޮށް އެމެރިކާގެ ގްރީން ކާޑަށް އެދި ހުށަހަޅާ މީހުންގެ އަދަދު ވެސް އިތުރު ވެފައި ވެއެވެ.
ޝީގެ ތިން ވަނަ ދައުރާއެކު ބޭރުގެ އިންވެސްޓަރުންވެސް ޗައިނާއިން ބޮނދަން އުޅޭ ކަމަށް ބުނެފައި ވެއެވެ. އެގޮތުން ޓައިވާނާއި ހޮންގކޮންގެ ވިޔަފާރިވެރިން އެމީހުންގެ ކުންފުނިތައް ވިއްކުމަށް މަސައްކަތް ކުރަމުންދާ ކަމަށް ބުނެފައި ވެއެވެ.
ޝެންހާއިގައި ގިނަ އަދަދެއްގެ ލަގްޒަރީ ގެތައް ވިއްކަން ހުށަހަޅާފައި ވެއެވެ. އަދި އެ ގެތަކުގެ އަގުތައްވެސް ބާޒާރުގެ އަގަށް ވުރެން 40 ޕަސެންޓް ކުޑަ ކޮށްފައިވާ ކަމަށް ވެއެވެ.
