ޓައިޥާނަށް އިންޑިއާއިން ފުޅާ ގޮތަކަށް ފުރުސަތުތައް ފަހި ވެގެން ދިޔައީ ލަދާކަށް ޗައިނާއިން ހަމަލަ ދިނުމުންނެވެ. ކުރިން ދުވަހަކުވެސް އިންޑިއާއާ ގާތް ނުވާ މިންވަރަށް ޓައިވާން ވަނީ އިންޑިއާއާ ގާތްވެފައެވެ. އިގްތިސާދީ އެއްބާރުލުމާ ބެހޭ ފުޅާ މަޝްވަރާތަކާއި ވިޔަފާރީގެ ދެ އިވެންޓެއްގައި ބައިވެރިވެ ވަޑައިގަތުމަށް ތައިވާންގެ އިކޮނޮމިކް މިނިސްޓްރީގެ ނާއިބް މިހަފްތާގައި އިންޑިއާއަށް ވަޑައިގަންނަވާނެއެވެ. އޭނާއާއެކު 70 މެންބަރުންގެ ވިޔަފާރީގެ ވަފުދެއް ވަޑައިގަންނަވާނެއެވެ.
ޓައިވާންގެ އިކޮނޮމިކް އެފެއާޒް މިނިސްޓްރީގެ ޑެޕިއުޓީ މިނިސްޓަރު ޗެރްން-ޗީ ޗެންގެ މި ދަތުރުފުޅަކީ ސައިންސާއި ޓެކްނޮލޮޖީގެ ދާއިރާއިން އެއްބާރުލުން ދިނުމާ ބެހޭ ބައްދަލުވުމެކެވެ.
އިންޑިއާއިން ދަނީ ހައިޓެކް މެނުފެކްޗަރިންގައި އިސްކޮށް ހަރަކާތްތެރިވާ ޓައިވާން ކުންފުނިތަކާއެކު މަޝްވަރާތައް ބާއްވަމުންނެވެ.
ޗެންއާއެކު ވަޑައިގަންނަވާ ވިޔަފާރި ވަފުދުގައި ޓައިވާންގެ މަޝްހޫރު ބައެއް އައިޓީ އަދި ޓެކް ކުންފުނިތަކުގެ މަންދޫބުން ބައިވެރިވެ ވަޑައިގަންނަވައެވެ.
މިދަތުރުފުޅުގައި ޓައިޥާން އިންޑިއާ ސީއީއޯއިންގެ ސަމިޓް ބައްދަލުވުމެއްވެސް އޮންނާނެއެވެ. މި ސަމިޓުގައި ފޯކަސް ކުރާ އެއް ދާއިރާއަކަށް ވާނީ އިންޑިއާގައި ޓައިވާނުގެ އިންވެސްޓްމަންޓްތަކަށް ހިތްވަރު ދިނުމެވެ. އަދި އިލެކްޓްރޯނިކްސް އުފެއްދުމާއި، ސްމާޓް ސިޓީތަކާއި، ފެހި ޓެކްނޮލޮޖީތަކާއި، ސްމާޓް އޮޓޯމޯޓިވް ކޮމްޕޯނެންޓްތަކުގައި އެއްބާރުލުން ދިނުމުގެ ފުރުސަތުތައް ހޯދުމަށް މަޝްވަރާތައްވެސް ކުރެވޭނެއެވެ.
