އިންޑިއާއަށް އެފްރިކާގެ ގައުމުތަކުގެ ދިފާއީ ބޭނުންތައް ފުއްދައި ދެވިދާނެ ކަމަށް އިންޑިއާގެއެގްޒިމް ބެންކުން ނެރެފައިވާ ރިޕޯޓއެއްގައި ބުނެއެވެ.
އެފްރިކާގެ މެރިޓައިމް، އެއަރޮސްޕޭސް އަދި ޑިފެންސް ބޭނުންތައް އިންޑިއާއަށް ފުރިހަމަ ކޮށްދެވިދާނެ ކަމަށް ބުނެ އެގްޒިމް ބޭންކުން ނެރުނު ރިޕޯޓް 'ރީއިންވައިގޯރޭޓިން އިންޑިއާސް އިކޮނޮމިކް އެންގޭޖްމަންޓްސް ވިތު ސަދަން އެފްރިކާ' އަށް ގިނަ ފަރާތްތަކުން ވަނީ މަރުހަބާ ކިޔާފައެވެ. މި ރިޕޯޓް ޝާއިއުކޮށްފައި ވަނީ ސަރުކާރުގެ އޮފިޝަލުންނާއި ވިޔަފާރިއާއި ސިނާއަތުގެ އިސްފަރާތްތަކުން ބައްދަލުކުރަމުންދާ ޗެމްބާ އޮފް ކޮމާސްއާއި އެކްސިމް ބޭންކް އިން އިންތިޒާމް ކުރި ފޯރަމްގައެވެ.
އެރިޕޯޓްގައި ބުނެފައި ވަނީ އިންޑިއާއިން އެއަރޮސްޕޭސް، ޑިފެންސް، މެރިޓައިމް އިކުއިޕްމަންޓް އަދި އަސްކަރީ އުޅަނދުފަހަރުގެ ދާއިރާތަކުން އެފްރިކާގެ ގައުމުތަކަށް އެއްބަރުލުންދިފިނަމަ، 2025 ވަނަ އަހަރަށް އިންޑިއާއިން ޓާގެޓް ކޮށްފައިވާ 5 ބިލިއަން ޑޮލަރުގެ ޑިފެންސް އެކްސްޕޯޓް ކުރުމުގެ ޓާގެޓް ކުރުމުގެ ލަނޑު ދަނޑި ހާސިލުކުރެވޭނެ ކަމަށެވެ.
ރިޕޯޓްގައި ބުނެފައިވާ ގޮތުން ޓާޓާ މޮޓޯސް އާއި އަޝޯކް ލޭލެންޑް ފަދަ އިންޑިއާގެ އަސްކަރީ އުޅަނދު އުފައްދާ ކުންފުނިތަކުގެ އުފެއްދުންތައް އެފްރިކާއަށް މިހާރުވެސް އުފައްދާ ފަދައިން ކުރިއަށް އޮތްތަނުގައި މެރިޓައިމް ދާއިރާއިން އިންޑިއާއިން ތަރައްގީކޮށްފައިވާ އާ ޓެކްނޮލޮޖީތަކާއި ޑްރޯން ޓެކްނޮލޮޖީގެ ސާމާނުތައް އެފްރިކާއަށް ފޯރުވައިދިނުން މުހިންމު ކަމަށެވެ.
އިންޑިއާ ކަނޑުގެ ސަރަހައްދުގައި ރައްކާތެރި ކަނޑުގެ މާހައުލެއް ގާއިމްކުރުމުގައި އެފްރިކާގައި އިންޑިއާ ކަނޑަށް އޮންނަ ނުވަ ގައުމަކީ އިންޑިއާގެ މުހިންމު ސްޓޭކްހޯލްޑަރުންތަކެއްކަން ރިޕޯޓުގައި ފާހަގަކޮށްފައިވެ އެވެ.
އެ ގައުމުތަކަކީ ކޮމޮރޯސް، ކެންޔާ، މަޑަގަސްކަރަ، މޮރިޝަސް، މޮޒެމްބިކް، ސީޝެލްސް، ސޯމާލިއާ، ދެކުނު އެފްރިކާ، އަދި ޓެންޒޭނިއާ އެވެ.
