ޖީ20ގެ ގައުމުތަކުގެ ވެރިން އިންޑޮނޭޝިއާގެ ބާލީގައި ބާއްވާ ސަމިތް ބައްދަލުވުން އޮންނާނީ ނޮވެމްބަރު މަހުގެ 15 އަދި 16 ވަނަ ދުވަހު އެވެ. އެ ސަމިޓްގައި ދުނިޔެއަށް ދިމާވެފައިވާ ގޮން ޖެހުންތަކާ މެދު ވިސްނާނެ ކަމަށް ބެލެވެއެވެ.
އޭގެ ތެރޭގައި ރަޝިޔާއިން ޔޫކްރޭނަށް އަރައިގަތުމުން ކުރިމަތިވި އިގްތިސާދީ އަސަރުތަކާއި އަދި އިތުރަށް ދުނިޔޭގައި ގޯސްވެފައިވާ އިގްތިސާދީ ހާލަތާއި ގަރުނެއްގެ ތެރޭގައި ކުރިމަތިވި އެންމެ ގޯސް އާންމު ސިއްހަތުގެ ކާރިސާއާއި މެދު ދުނިޔޭގެ ލީޑަރުން ފިކުރު ކުރައްވާނެއެވެ.
އެބޭފުޅުންގެ މަޝްވަރާގައި ދަނޑުވެރިކަމުގެ ބާވަތްތަކާއި، ދަނޑު ގޮވާމުގެ ބާވަތްތަކާއި ކައްކާން ބޭނުން ކުރާ ތެލާއި ގޮދަންގެ އަގުތައް ކޮންޓްރޯލުން ނެއްޓިގެން ދިއުމުގެ މައްސަލަތަކާ މެދު މަޝްވަރާ ކުރާނެއެވެ.
ދުނިޔޭގައި މިހާރު ވަނީ ކާބޯތަކެތީގެ އަގުތައް އުފުލިގެން ގޮސްފައެވެ. އަދި ސަޕްލައި ޗޭންތަކަށް ބުރޫއެރުމުން ދިރިއުޅުމުގެ ހަރަދުތައް ބޮޑުވުމާއެކު، ދުނިޔޭގެ އިންފްލޭޝަން މިއަހަރު ވަނީ 6.7 ޕަސެންޓަށް އަރާފައެވެ.
ޖީ20ގެ ގައުމުތަކަކީ ދުނިޔޭގެ ޖީޑީޕީގެ ގާތްގަނޑަކަށް 80 ޕަސެންޓާއި، ދުނިޔޭގެ ވިޔަފާރީގެ 75 ޕަސެންޓާއި، އާބާދީގެ 60 ޕަސެންޓް ހިމެނޭ 20 ގައުމުގެ ފޯރަމެކެވެ.
