ދުނިޔޭގެ ޖައްވަށް އެންމެ ގިނައިން ވިހަ ގޭސްތައް ބޭރު ކުރާ ޗައިނާގެ ރައީސް އ.ދ.ގެ މޫސުމީ ބަދަލުތަކާ ބެހޭ މަހާސިންތާގެ 27ވަނަ ކޮންފަރެންސް އޮފް ދަ ޕާޓީސް (ކޮޕް27)ގެ ބައްދަލުވުމަށް ވަޑައެއް ނުގެންނެވިއެވެ.
ކޮޕް27 ވަނީ މިޞްރުގެ ޝަރްމުއްޝައިޚް ސިޓީގައި ފަށާފައެވެ.
ދުނިޔޭގެ ލީޑަރުން ޗައިނާއިން އެދިފައި ވަނީ ކޮޕް27 ގެ ކުރިން އެގައުމުން އައު ގްރީން ކޮމިޓްމަންޓްތަކެއް އިއުލާން ކުރުމަށެވެ. އެހެންނަމަވެސް ޗައިނާއިން އަދި އާ ޕްލޭނެއް ހުށަހަޅާފައެއް ނުވެ އެވެ.
ޗައިނާ ސަރުކާރުގެ މޫސުމީ ފިޔަވަޅުތައް ޓްރެކްކުރާ މިނިވަން ސައިންޓިފިކް އެނަލިސިސްއެއް ކަމަށްވާ ކްލައިމެޓް އެކްޝަން ޓްރެކަރ އިން ބުނަނީ ޗައިނާ އިން ކުރިން ކަނޑައަޅާފައިވާ އަމާޒުތަކަށް ވާސިލެއްނުވެވޭނެ ކަމަށެވެ. އަދި އަންނަ އަހަރު އެގައުމުގެ ކަރަންޓް ބޭނުންކުރާ މިންވަރު 6 ޕަސެންޓަށް އިތުރުވާނެ ކަމަށާއި 2030 ވަނަ އަހަރު ގްރީން ހައުސް ގޭސް ދޫކުރާ މިންވަރު 26 ޕަސެންޓް އިތުރުވާނެ ކަމަށެވެ.
ޝަރަމުއްޝެއިޚުގައި ޗައިނާގެ ނިންމުންތަކާއި ވައުދުތަކަށް ފާރަވެރިވާން ބައިނަލްއަގްވާމީ މުޖުތަމައުން އޮތީ ތައްޔާރަށެވެ.
ދުނިޔޭގެ ފިނިހޫނުމިން 1.5 ޑިގްރީ ސެލްސިޔެސްގައި ހިފެހެއްޓުމަށް ދުނިޔެއިން ކުރަން ޖެހޭ މަސައްކަތްތައް ބުރަވެފައި ބޮޑުކަމަށް ސައިންސްވެރިން ބުނެއެވެ. އަދި އެންމެ މުހިންމު ކަމަކީ، ޖައްވަށް ބޭރު ކުރާ ގިހާ ގޭސްތަކުގެ މިންވަރު ދަށް ކުރުމެވެ. މިހާރު އަމާޒު ހިފާފައި 2030ވަނަ އަހަރުގެ ކުރިން އެ އަދަދު 45 އިންސައްތަ ދަށް ކުރަން ޖެހެއެވެ. ނަމަވެސް، މިހާރު ކަން ހިނގަމުންދާ ގޮތަށް ބަލާއިރު، އެއީ ހާސިލު ކުރެވޭނެ ލަނޑުދަނޑިއެއް ކަމާ މެދު ދަނީ ސުވާލު އުފެދެމުންނެވެ.ސައިންސްވެރިން އެންމެ ފަހުން ހަދާފައިވާ ދިރާސާތަކުން ފެންނަނީ ވަރަށް ބިރުވެރި މަންޒަރެކެވެ. ޖައްވަށް ބޭރުކުރާ ކާބަންގެ މިންވަރު މި ޤަރުނު ނިމުމުގެ ކުރިން 10 އިންސައްތަ އިތުރުވާނެ ކަމަށް ސައިންސްވެރިންގެ ހިސާބުތަކުން ދައްކައެވެ. އަދި އެ ގޮތަށް ކަން ހިނގައްޖެ ނަމަ، ދުނިޔޭގެ ފިނިހޫނުމިން 2.8 ޑިގްރީ ސެލްސިއެސްއަށް ވުރެން އިތުރު ވާނެއެވެ.
