އިނގިރޭސި ޕްރިމިއަރ ލީގުގެ އޮކްޓޫބަރު މަހުގެ އެންމެ މޮޅު ކުޅުންތެރިޔާގެ މަގާމާއި އެންމެ މޮޅު ލަނޑު ޖެހި ކުޅުންތެރިޔާގެ މަގާމް، ނިއުކާސަލް ޔުނައިޓެޑަށް ކުޅެމުން އަންނަ ޕެރަގުއޭގެ ވިންގަރ މިގުއެލް އަލްމިރޮންއަށް ލިބިއްޖެއެވެ.
އަލްމިރޮން ވަނީ އޮކްޓޫބަރު މަހު ނިއުކާސަލް ޕްރިމިއަރ ލީގުގައި ކުޅުނު 5 މެޗުގައި 6 ލަނޑު ކާމިޔާބު ކޮށްފައެވެ. މޮޅު ލަނޑުގެ އެވޯޑް އޭނާއަށް ލިބުނީ ފުލަމް ކޮޅަށް އޭރިޔާގެ ބޭރުން ޖެހި ހިތްގައިމު ލަނޑަށެވެ.
އަލްމިރޮންއަކީ ޕެރަގުއޭއަށް ނިސްބަތްވާ ކުޅުންތެރިންގެ ތެރެއިން ޕްރިމިއަރ ލީގުން ހޮވާ މަހުގެ މޮޅު ކުޅުންތެރިޔާގެ އެވޯޑް ހޯދި ދެވަނަ ކުޅުންތެރިޔާއެވެ. ފުރަތަމަ މިއެވޯޑް ހޯދާފައި ވަނީ 2007 ވަނަ އަހަރު، އޭރު ބްލެކްބާން ރޯވާސްގައި ވިދާލި ފޯވާޑް ސަންޓާ ކްރުޒްއެވެ.
އަލްމިރޮން ބުނީ އެވޯޑް މިލިބުނީ ވަރަށް ރަނގަޅު ވަގުތެއްގައި ކަމަށާއި މިއީ ހާއްސަ އުފަލެއް ކަމަށެވެ.
އޮކްޓޫބަރު މަހުގެ މޮޅު ކޯޗުގެ އެވޯޑް ލިބުނީ ނިއުކާސަލްގެ ކޯޗް އެޑީ ހޯވްއަށެވެ. ހޯވްގެ އިރުޝާދުގެ ދަށުން ނިއުކާސަލްއިން ވަނީ ބޮޑު ކުރިއެރުމެއް ހޯދައި ލީގުގެ ތިންވަނަ މަގާމަށް ކުރިއަށް ޖެހިލާފައެވެ.
