ގަތަރުގައި މިރޭ ފެށުމަށް ހަމަޖެހިފައިވާ ވޯލްޑް ކަޕުގައި ވާދަ ކުރާ ގައުމު ތަކުގެ ތެރޭގައި މަޝްހޫރު އިޓަލީ ނެތުމުން ދިވެހިންނަށް ފަޅުކަމެއް އިހްސާސްވިނަމަވެސް، ރާއްޖޭގެ އެކި ކަންކޮޅުތަކުގައި ވޯލްޑް ކަޕް ބެލުމާއި ސަޕޯޓް ކުރުމުގެ އެންމެ ފަހުގެ ތައްޔާރީތައް ފޯރީގައި ކުރިއަށް އެބަދެއެވެ.
ރާއްޖެއަށް އެންމެފުރަތަމަ ވޯލްޑް ކަޕް ފެންނަން ފެށީއްސުރެ (1986 ގެ ވޯލްޑް ކަޕް) ދިވެހިންގެ މެދުގައި އެންމެ މަގްބޫލް އެއްގައުމީ ޓީމަކީ މިހާތަނަށް ހަތަރު ފަހަރު ދުނިޔޭގެ ޗެމްޕިއަންކަން ހޯދާފައިވާ އިޓަލީއެވެ.
ވަކިން ހާއްސަކޮށް ނުވަދިހައިގެ ކުރީކޮޅުން ފެށިގެން ދެހާހުގެ ކުރީކޮޅާ ހަމައަށް އިޓާލިއަން ލީގް ދުނިޔޭގެ ރަސްކަން ކުރިއިރު، އިޓަލީގެ ނަން ހިނގާ މަޝްހޫރު ކުޅުންތެރިން ސީޒަން ނިމުމުން ޗުއްޓީ ހޭދަކޮށްލުމަށް އަންނަ އާންމު މަންޒިލަކަށް ރާއްޖެ ވެފައި އޮތުމުން، ދިވެހިންނާއި އިޓަލީގެ މަޝްހޫރު ކުޅުންތެރިންނާމެދު އޮތީ ހާއްސަ ގުޅުމެއް އުފެދިފައެވެ. މިގުޅުމުގެ ތެރެއިން އިޓަލީ ގައުމީ ޓީމަށް ސަޕޯޓް ކުރުމުގެ ރޫހުވެސް އޮތީ އުފެދިފައެވެ.
އިޓަލީ މިފަހަރުގެ ވޯލްޑް ކަޕް ނެތުމުން ފަޅުކަން ދިވެހިންގެ ތެރެއިން އެންމެ ބޮޑަށް އިހްސާސް ކުރާނެ ބަޔަކީ ދިވެހި އަންހެން ސަޕޯޓަރުންނެވެ. އާންމުކޮށް ބޭރު ދުނިޔޭގެ ފުޓްބޯޅަ ބަލައި ނުހަދައި އުޅޭ އަންހެން ކަނބަލުންނަށްވެސް އިޓަލީގެ މަޝްހޫރު ތަރިންގެ ވަނަރު ފަރިތަކަމީ ބޮޑު ސިއްރެކެވެ.
ކުރިންނަމަ މަލްޑީނީ އާއި ޓޮއްޓީ، ކަންނަވާރޯ އާއި ޑެލްޕިއޭރޯ އަދި ފިލިޕޯ އިންޒާގީ އާއި އެލެސަންދްރޯ ނެސްޓާ އާއި އަންދްރޭ ޕިރްލޯއަކީ ދިވެހިންނަށް ފަރިތަ ނަންނަމަވެ. މިފަހުން ކިއެލިނީ އާއި ބޮނޫޗީ އަދި އިންސީނޭއަކީ ދިވެހިންނަށް މަގުބޫލް ނަންތަކެވެ.
މިފަހަރުގެ ވޯލްޑް ކަޕުގައި ނެތަސް، މަގުމަތިންނާއި ސޯޝިއަލް މީޑިޔާއިން ފެންނަނީ ދިވެހިން ވޯލްޑް ކަޕަށް ފޯރިއާއެކު ތައްޔާރު ވަމުންް އަންނަ މަންޒަރެވެ. ބޮޑުރަށެއް ކުޑަރަށެއް ނެތި މެޗުތައް ބެލުމަށް ބޮޑެތި ސްކްރީންތައް ބެހެއްޓުމާއި މަގުމަތީގަޔާއި ގޭގައި ދިދަފަތި ދެމުމާއި ބޮޑެތި ދިދަތައް ނެގުން ފޯރީގައި ދަނީ ކުރިިއަށެވެ.
ވޯލްޑް ކަޕް ހުޅުމުގެ ރަސްމިޔާތަށް ދިވެހިންގެ ގިނަބަޔަކު ތިބީ އިންތިޒާރު ކޮށްގެންނެވެ. ވޯލްޑް ކަޕް ހުޅުވުމުގެ ރަސްމިއްޔާތު ފަށާނީ މިރޭ ރާއްޖޭ ގަޑިން 20:00 ގައެވެ. ރަސްމިއްޔާތު ކުރިއަށްދާނީ 60،000 ސަޕޯޓަރުންގެ އަލްބަޔަތު ސްޓޭޑިއަމްގައެވެ.
ވޯލްޑް ކަޕް ހުޅުވުމުގެ ރަސްމިއްޔާތަށްފަހު ރާއްޖޭ ގަޑިން 21:00 ގައި މިފަހަރުގެ ވޯލްޑް ކަޕުގެ ފުރަތަމަ މެޗުގެ ކުޅުން ފަށާނެއެވެ. ބައްދަލު ކުރާނީ ގަތަރާއި އިކްއެޑޯއެވެ.
މިފަހަރުގެ ވޯލްޑް ކަޕަކީ މިހާތަނަށް ބާއްވާ 22 ވަނަ ވޯލްޑް ކަޕެވެ. ވޯލްޑް ކަޕުގެ ތާރިހުގައި މިހާތަނަށް 79 ގައުމުން ވާދަކޮށްފައިވާއިރު ފައިނަލުން ޖާގަ ހޯދިފައި ވަނީ 13 ގައުމަކަށެވެ. އެއީ މުޅިންވެސް ޔޫރަޕާއި ދެކުނު އެމެރިކާއަށް ނިސްބަތްވާ ގައުމުތައްކަން ފާހަގަ ކޮށްލެވެއެވެ. މީގެ ތެރެއިން މުބާރާތް ކާމިޔާބު ކުރެވިފައި ވަނީ އެންމެ 8 ގައުމަށެވެ. ވޯލްޑް ކަޕުގެ ހުރިހާ މުބާރާތެއްގައި ވާދަކޮށްފައިވާ ހަމައެކަނި ގައުމަކީ ބްރެޒިލެވެ. ފަސްފަހަރު މުބާރާތް ކާމިޔާބުކޮށް، ބްރެޒިލަކީ މުބާރާތުގެ އެންމެ ކާމިޔާބު ގައުމުވެސް މެއެވެ.
