ޗައިނާގެ ދުރު ހުޅަނގު ޝިންޖިއާން ސަރަހައްދުގައި މަދުން ނޫނީ ނުފެންނަ މުޒާހަރާއެއް ހިނގައިފިއެވެ. މި މުޒާހަރާއަކީ ލޮކްޑައުންގެ ފިޔަވަޅުތައް އަޅާފައި ވުމާއެކު ދިމާވި އަމިފާނުގެ ހާދިސާއެއްގައި މީހުން ނިޔާވުމުން އެކަމާ ދެކޮޅަށް ބޭއްވި މުޒާހަރާއެކެވެ.
ޗައިނާގެ ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި މީހުން ވަނީ ފުލުހުންނާ ދިމާއަށް “ލޮކްޑައުން ނިންމާލާ!” އޭ ބުނެ ހަޅޭއް ލަވާފައެވެ.
ރޮއިޓާސް އިން ޔަގީންކޮށްދިން ގޮތުގައި އެ ވީޑިއޯ ފޫޓޭޖްތަކަކީ ޝިންޖިއާންގެ ވެރިރަށް އުރަމްކީގައި ނަގާފައިވާ ވީޑިއޯތަކެކެވެ.
ވީޑިއޯތަކުން ފެންނަ ގޮތުގައި މައިދާނަކަށް އެއްވެ ތިބި މީހުން ޗައިނާގެ ގައުމީ ލަވައެއް ކިޔަމުން ދިޔައިރު ކިޔަމުން ދިޔައީ “އަޅަކަށް ވާން ދެކޮޅު ހަދާ މީހުން ތެދުވޭ!” އެފަދައިންނެވެ.
ޗައިނާއިން ވަނީ ޝިންޖިއާން ސަރަހައްދުގެ ބޮޑު ބައެއް ލޮކްޑައުން ކޮށްފައެވެ. ވެރިރަށް އުރަމްކީގެ ހަތަރު މިލިއަން މީހުންގެ ތެރެއިން ގިނަ ބަޔަކަށް ވަނީ 100 ދުވަހުގެ މުއްދަތަށް ގެއިން ބޭރަށް ނުކުތުން މަނާކޮށްފަ އެވެ. ވޭތުވެދިޔަ ދެދުވަހުގެ ތެރެއިން ކޮންމެ ދުވަހަކު ވެސް ވެރިރަށުން ގާތްގަނޑަކަށް 100 އެއްހާ މީހުން ކޮވިޑް-19 އަށް ފައްސިވެފައިވެއެވެ. ޝިންޖިއާންއަކީ 10 މިލިއަން އުއިގޫރު މީހުން ދިރިއުޅޭ ޕްރޮވިންސެކެވެ.
އިންސާނީ ހައްގުތަކާ ބެހޭ ޖަމާއަތްތަކާއި ހުޅަނގުގެ ސަރުކާރުތަކުން ތުހުމަތު ކުރަމުން އަންނަނީ ބެއިޖިން އިން ބައިމަދު މުސްލިމުންނަށް އަނިޔާ ކުރާ ކަމަށާއި އަދި ކޭމްޕްތަކުގައި ބަންދުކޮށްގެން ގެންގުޅެ މަޖުބޫރުކޮށްގެން މަސައްކަތް ކުރުވާކަމަށެވެ. ޗައިނާއިން މި ވާހަކަތަކާ ދެކޮޅު ހަދައެވެ.
އުރުމްކީގައި ރޯވި އިމާރާތުގެ ހާދިސާގައި 10 މީހުން މަރުވެފައި ވެއެވެ. އާންމުން ބުނި ގޮތުގައި މީހުން މަރުވާން ދިމާވީ އަލިފާން ރޯވުމުންވެސް ލޮކްޑައުންގެ ފިޔަވަޅުތައް ކަމަށް ބުނެ މީހުން އިމާރާތުން ނިކުތުމަށް ކަމާބެހޭ މީހުން ދެކޮޅު ހެދުމުގެ ސަބަބުންނެވެ. ޗައިނާގެ ސޯޝަލް މީޑިއާގައި ހިއްސާކުރި ވީޑިއޯތަކުން ފެންނަނީ އިމާރާތުގެ ބައެއް ތަޅުލާފައި ވަނިކޮށެވެ.
އުރުމްކީގެ އޮފިޝަލުން ވަނީ އެހާދިސާއަށްފަހު ކުއްލިއަކަށް ނޫސްވެރިންގެ ބައްދަލުވުމެއް ބާއްވައި، ކޯވިޑް-19 ގެ ފިޔަވަޅުތަކުގެ ސަބަބުން އެއްވެސް މީހަކަށް ސަލާމަތްވުމަށް ހުރަސްއެޅިފައި ނުވާނެ ކަމަށް ބުނެ ވާހަކަ ދައްކާފައެވެ.
