ޕާކިސްތާންގައި މިހާރު އޮތް ސިޔާސީ ނިޒާމުން އޭނާގެ ޕާޓީ ބަރީއަވެގެންފައިވާ ކަމަށް ޕާކިސްތާން ތަހްރީކޭ އިންސާފް ޕާޓީގެ ޗެއާމަން އިމްރާން ޚާން ވަނީ މިއަދު ވިދާޅުވެފައެވެ. އޭނާ ވިދާޅުވީ ޕާކިސްތާންގެ ހުރިހައި ގާނޫނު ހަދާ މަޖިލިސްތަކުން އޭނާގެ ޕާޓީގެ މެމްބަރުން އިސްތިއުފާ ދޭން ނިންމާފައިވާ ކަމަށެވެ.
"އަޅުގަނޑުމެން މި ނިޒާމުގެ ބައެއްގެ ގޮތުގައި ނުތިބޭނަން. އަޅުގަނޑުމެން ނިންމާފައި މިވަނީ ހުރިހާ މަޖިލިސްތަކުން ވަކިވެ މި ކޮރަޕްޓް ނިޒާމުން ނިކުންނަން" އިމްރާން ޚާން މިއަދުގެ އެއްވުމުގައި ވިދާޅުވިއެވެ.
ޕަންޖާބާއި، ޚައިބަރު ޕަޚްތުންޚްވާއާއި، ހިފާފައިވާ ކަޝްމީރާއި، ގިލްގިޓް ބަލްޓިސްތާންގައި ވެރިކަން ކުރަނީ އިމްރާންގެ ޕީޓީއައި ޕާޓީންނެވެ.
ކުރިން އިސްލާމްއާބާދާ ދިމާއަށް ބޮޑު ހިނގާލުމެއް ބާއްވާނެ ކަމަށް އިންޒާރު ދިނުމަށްފަހު އޭނާ ވަނީ ފަހުން އެކަން ކެންސަލް ކުރައްވާފައެވެ.
އިމްރާން ޚާން ވިދާޅުވީ ޕީޓީއައި އިން އިސްލާމްއާބާދަށް ނުދިއުމަށް ނިންމީ ހަލަބޮލިކަމެއް ނުއުފެއްދުމުގެ ގޮތުންނެވެ. އޭނާ އިތުރަށް ވިދާޅުވީ އޭނާގެ ނިންމުމާ ގުޅޭ ގޮތުން ވަރަށް އަވަހަށް ޗީފް މިނިސްޓަރުންނާއި ގާނޫނު ހަދާ މަޖިލީހުގެ ޕާޓީގެ މެމްބަރުންނާ ބައްދަލު ކުރައްވާނެ ކަމަށާއި އެ ޕާޓީން މަޖިލިސްތަކުން ވަކިވާނެ ދުވަހެއް ވަރަށް އަވަހަށް އިއުލާން ކުރައްވާނެ ކަމަށެވެ.
