ވަރލްޑް ކަޕް ދެވަނަ ބުރުގައި މިރޭ ސްވިޓްޒަލޭންޑާ ދެކޮޅަށް ޕޯޗުގަލްއިން ނެެރޭ ފުރަތަމަ އެގާރައިން މަޝްހޫރު ކުޅުންތެރިޔާ ކްރިސްޓިއާނޯ ރޮނާލްޑޯއަށް ޖާގަ ނުދީ ބެންޗަށް ލައިފިއެވެ.
ރޮނާލްޑޯ ބެންޗަށް ލާފައި މިވަނީ މިފަހަރުގެ ވަރލްޑް ކަޕުގައި ރޮނާލްޑޯ ކުޅުމެއް ނުދެއްކޭ ކަމަށް ބުނެ އޭނާ ބެންޗަށް ލުމަށް ޕޯޗުގަލްގެ ގިނަ ސަޕޯޓަރުންތަކެއްވެސް އަޑުއުފުލަމުންދާ ދަނޑިވަޅެއްގައިކަން ފާހަގަ ކޮށްލެވެއެވެ.
ރޮނާލްޑޯގެ ބަދަލުގައި ފުރަތަމަ އެގާރައިން ފުރުސަތު ދީފައި ވަނީ ބެންފީކާއަށް ކުޅެމުން އަންނަ އުމުރުން އެންމެ 21 އަހަރުގެ ފޯވާޑް ގޮންކާލޯ ރާމޯސްއަށެވެ. ދެފައިން އެއްވަރަކަށް ކުޅޭ ރާމޯސް ބޮޑަށް ފާހަގަ ކުރެވެނީ ކޮއްޓުމާއި ނެއްޓުން ހަލުވި ކުޅުންތެރިއެއްގެ ގޮތުގައެވެ.
ސްވިޓްޒްލޭންޑާއި ޕޯޗުގަލް ބައްދަލު ކުރާ މެޗް ފަށާނީ މިރޭ ރާއްޖޭ ގަޑިން ދަންވަރު 12 ޖަހާއިރުއެވެ. މިމެޗުން މޮޅުވާ ގައުމެއް ކުއާޓާގައި ބައްދަލު ކުރަން ޖެހޭނީ މޮރޮކޯއާއެވެ.
