ކައިވެނީގެ ބޭރުން ޖިންސީ ގުޅުން ހިންގުން، ޔައުނީ ޒިނޭ ކުރުމާއި އެއްޖިންސުން ބަދުއަޚުލާގީ އަމަލު ހިންގުން ކުށަކަށް ހަދަމުން އިންޑޮނޭޝިއާއިން އައު ގާނޫނުލްއުގޫބާތެއް ފާސްކޮށްފިއެވެ. މިއީ އެވޭލާ ޒަމާނުގެ އިސްތިއުމާރީ ގާނޫނުލްއުގޫބާތަށް ބަދަލު ގެނައުމަށް ޒަމާންގަނޑެއް ވަންދެން ބަހުސްކުރުމަށް ފަހު ފާސްކޮށްފައިވާ ގާނޫނެކެވެ.
އެ ގާނޫނު ހަރުކަށިވެފައި ހައްގުތައް ހަނިކުރެވި މިނިވަންކަން ނިގުޅައި ގަންނާނެ ކަމަށް ހައްގުތަކަށް މަސައްކަތް ކުރާ ފަރާތްތަކުން ބުނެއެވެ.
އިންޑިނޭޝިއާގެ ޖަސްޓިސް މިނިސްޓްރީން ބުނެފައި ވަނީ އެންމެން ރުހޭ ގޮތަށް ގާނޫނު ފާސްނުކުރެވޭނެ ކަމަށެވެ. ނަަމަވެސް ފުޅާދާއިރާއެއްގައި ގިނަ ބަޔަކު އެދޭގޮތަށް ފާސްކުރުމަށް މަސައްކަތް ކޮށްފައިވާނޭ ކަމަށެވެ.
އާ ގާނޫނުލް އުގޫބާތަށް ތިން އަހަރަށް ފަހުން އަމަލު ކުރަން ފަށާއިރު ހޮޓާތަކަށް ޗެކިން ކުރާ ބިދޭސީންވެސް ކައިވެނި ސެޓިފިކެޓް ދައްކަން ޖެހޭނެއެވެ.
ސަރުކާރުން ބުނެފައި ވަނީ ގާނޫނު ފާސްކުރުމުގައި އިންޑޮނޭޝިއާގެ ޕަންޗަސީލާ ފިކުރަށް ރިއާޔަތް ކޮށްފައިވާނެ ކަމަށެވެ. ޕަންޗަސީލާއަކީ އިންޑޮނޭޝިއާގެ ދައުލަތް ބިންވަޅު ނެގިފައިވާ ސިޔާސީ ފިކުރެވެ.
އައު ގާނޫނުލްއުގޫބާތުގައި އިތުރަށް ޖިނާއީ ކުށެއްކަމަށް ކަނޑައަޅާފައިވާ ކަންކަމަކީ ރައީސާއި ނާއިބް ރައީސާއި ކެބިނެޓް މެމްބަރުންނަށް ފާޑު ކިޔުމެވެ.
ދީނަށް ފުރައްސާރަ ކުރުންވެސް ޖިނާއީ ކުށަކަށް ހަދާފައި ވެއެވެ.
ޕާލަމެންޓްގައި މި ގާނޫނު ފާސްކޮށްފައިވަނީ އިއްތިފާގުންނެވެ.
ޖަސްޓިސް މިނިސްޓްރީން ބުނެފައިވަނީ އެއްވެސް ފަރާތެއްގެ ހައްގަށް އުނިކަން ލިބިފައިވާ ކަމަށް ފާހަގަ ވާނަމަ ދުސްތޫރީ ކޯޓަށް އެފަރާތަކުން މައްސަލަ ހުށަހެޅުމަށެވެ.
2019ން ފެށިގެން އައު ގާނޫނާ މެދު އިންޑޮނޭޝިއާއިން ބަހުސްކޮށްފައި ވެއެވެ.
