ނިއުޔޯކް ޓައިމްސްގެ މުވައްޒަފުން ގެންދަނީ މިއަދު 24 ގަޑިއިރުގެ ހަޅުތާލެއް ބޭއްވުމަށް އިންތިޒާމުކުރަމުންނެވެ. މިއީ 40 އަހަރަށް ވުރެ ގިނަ ޒަމާނަކަށް ފަހު އެ ނޫހުގައި ބާއްވާ މިފަދަ ފުރަތަމަ ހަޅުތާލެވެ.
ނިއުޔޯކް ޓައިމްސްގެ ނިއުސްރޫމްގެ މުވައްޒަފުންނާއި ނިއުޔޯކުގެ ދަ ނިއުސްގިލްޑްގެ އެހެން މެމްބަރުން ބުނާ ގޮތުގައި 2021 ވަނަ އަހަރުގެ މާޗް މަހު އެންމެ ފަހުގެ ކޮންޓްރެކްޓް ހަމަވި ފަހުން އެއްބަސްވުން އައު ކުރުމަށް ވާހަކަތައް ދިގު ދަންމާފައިވާތީ މިހާރު މަސައްކަތް މަތިން ފޫހިވެފައިވާ ކަމަށެވެ. އަދި ދެ ފަރާތުން ކޮންޓްރެކްޓް އެއްބަސްވުމަކަށް އާދެވޭހާ ހިނދަކު ހަޅުތާލް ކުރިއަށް ގެންދާނެ ކަމަށެވެ.
އަންގާރަ ދުވަހުގެ ފަހު ވަގުތާާ ހަމައަށް 12 ގަޑިއިރަށް ވުރެ ގިނައިރު ކުރިއަށް ގެންދިޔަ މަޝްވަރާތައް އެއްވެސް ނަތީޖާއެއް ނުލިބި ނިމުނެވެ. އަދި ބުދަ ދުވަހު ވެސް ކުރިއަށް ގެންދިޔަ މަޝްވަރާތަކުގައި މުސާރަ ބޮޑުކުރުމާއި ގޭގައި ތިބެގެން ދުރުން މަސައްކަތް ކުރުމުގެ ޕޮލިސީތަކުގައި ދެފަރާތަށް އެއް ގަލަކަށް އެރިފައެއް ނުވެެއެވެ.
