މިފަހަރުގެ ވަރލްޑް ކަޕުގެ ފެވަރީޓުންނަކީ ބްރެޒިލް ކަމަށާއި އެކަމަކު ލިބޭ ފުރުސަތުތަކުގެ ބޭނުން ހިފިއްޖެނަމަ މިރޭ ކްރޭޝިޔާއަށް ސެމީފައިނަލަށް ދެވެން އޮތް ފުރުސަތު ކުޑަ ނޫން ކަަމަށް އެގައުމުގެ ތަޖުރިބާކާރު ކޯޗް ޒަލްޓާން ޑަލިޗް ބުނެފިއެވެ.
ޑަލިޗް މިހެން ބުނީ ކުއާޓާފައިނަލުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ޑަލިޗަކީ ވަރލްޑް ކަޕުގެ ތަޖުރިބާ ބޮޑު ކޯޗެކެވެ. ރަޝިޔާގައި 2018 ވަނަ އަހަރު ބޭއްވި ވަރލްޑް ކަޕުގެ ސެމީފައިނަލުގައި މަޝްހޫރު އިންގްލެންޑް ކަޓުވާލުމަށްފަހު ފައިނަލުން ކްރޭޝިޔާއަށް ޖާގަ ހޯދައި ދިނީވެސް ޑަލިޗެވެ.
"މުބާރާތުގެ ފެވަރީޓުންނަކީ ބްރެޒިލް. ބްރެޒިލް ސްކޮޑުގައި ހިމެނޭ ވަކިވަކި ކުޅުންތެރިންގެ ހުނަރަށް ބަލާއިރު މިމުބާރާތުގައި ފެންނަން އޮތް އެންމެ ނުރައްކާތެރި ޓީމަކީ ބްރެޒިލް. އެކަމަކު އޭގެ މާނައަކީ އަހަރެމެންނަށް އޮތް ފުރުސަތު ބަންދުވީއެކޭ ނޫން. ބްރެޒިލްގެ އެޓޭކްތައް ހުއްޓުވުމަށްފަހު އަހަރެމެންނަށްވެސް ފުރުސަތުތަކެއް ލިބޭނެ. ތޫނުފިލިކޮށް މިފުރުސަތުތަކުގެ ބޭނުން ކުރެވިއްޖެނަމަ ސެމީއަށް ނުދެވޭންވީ ސަބަބެއް ނެތް" ޑަލިޗް ބުންޏެވެ.
ބްރެޒިލް އާއި ކްރޭޝިޔާ މީގެ ކުރިން ވަނީ 2006 އަދި 2014 ގެ ވަރލްޑް ކަޕުގައި ބައްދަލު ކޮށްފައެވެ. މިދެފަހަރުވެސް މޮޅުވީ ބްރެޒިލްއެވެ.
ޑަލިޗް ބުނީ ކްރޭޝިޔާ ކޮޅަށް ނަތީޖާ އަނބުރާލުމަށް ކުޅުންތެރިން އަމިއްލަ ނަފްސަށް ވަރަށް ބޮޑަށް އިތުބާރު ކުރަންޖެހޭ ކަމަށެވެ. "ބްރެޒިލާ ދެކޮޅަށް ކުޅުންތެރިން ނިކުންނަން ވާނީ މޮޅުވެވޭނެކަން ގަބޫލްކޮށްގެން. ބްރެޒިލުން ގިނަވަގުތު ބޯޅަ ގެންގުޅެ މެޗް ކޮންޓްރޯލް ކުރާ ވަގުތު އަހަރެމެން ވަރަށް ބޮޑަށް ސަމާލުވެ ތިބެންޖެހޭ" ޑަލިޗް ބުންޏެވެ.
ކްރޭޝިޔާ އާއި ބްރެޒިލް ބައްދަލު ކުރާ ކުއާޓާފައިނަލް މެޗް ފަށާނީ ރާއްޖޭ ގަޑިން މިރޭ 20:00 ގައެވެ.
