އިނގިރޭސިވިލާތުގައި ދިރިއުޅުމުގެ ފެންވަރު ދަށްވެ އިންފްލޭޝަން 11 ޕަސެންޓަށް އަރައިފިއެވެ. މީހުން ދަނީ މުޒާހަރާއަށް ނިކުންނަމުންނެވެ. އަދި ކްރިސްމަސްއާ ދިމާކޮށް ބޮޑެތި މުޒާހަރާތައް ބާއްވައި ގައުމު ހުއްޓުމަކަށް އައިސްފާނެތީ ސަރުކާރުން ދަނީ މުޒާހަރާ ކޮންޓްރޯލު ކުރުމަށް ސިފައިންގެ އެހީ ހޯދުމަށް މަސައްކަތް ކުރަމުންނެވެ.
ހަފްތާ ނިމުނު އިރު ސްކޮޓްލެންޑްގައި ޔުނިވަރސިޓީ ޕރޮފެސަރުން ވަނީ މުޒާހަރާތައް ބާއްވާފައެވެ. އަދި އިތުރު އެހެން ހަޅުތާލާއި މުޒާހަރާތަކަށް އެމީހުން ރާވާފައި ވެއެވެ.
އިނގިރޭސިވިލާތުގެ ތެޔޮ އުފައްދާ ކުންފުނިތަކުގެ މުވައްޒަފުންގެ މުސާރަ ކުޑަކަމުން އެމީހުންވެސް ވަނީ މުޒާހަރާއަށް ނިކުމެ ހަޅުތާލު ކުރުމަށް ނިންމާފައެވެ.
ލަންޑަންގެ މެޓްރޯއާއި ބަސް ދުއްވާ ކުންފުންޏާ އެއަރޕޯޓް މުވައްޒަފުންވެސް ހަޅުތާލު ކުރާނެއެވެ. މުވާސަލާތުގައި ކުންފުނިތަކުގެ މުވައްޒަފުން ހަޅުތާލު ކުރާތާ މިހާރު މަސްދުވަސްވެފައި ވެއެވެ.
15 ޑިސެމްބަރުން ފެށިގެން ނަރުހުންވެސް މުޒާހަރާއަށް ނިކުންނާނެއެވެ. އެމީޙުންގެ ހަޅުތާލުގައި އެމްބިއުލޭންސް ޑްރައިވަރުން ބައިވެރިވުމަށްވެސް އެދިފައި ވެއެވެ.
