އިނގިރޭސި މީހާ، ޖޯންސްގެ ގޭގެ ދޮރުގެ ބެލް ޖެހުމުގެ އަޑަށް ސިޓިން ރޫމުގައި މަޖާކޮށްލަން ތިބި އާއިލާގެ އެންމެންގެ ސަމާލުކަން ދޮރަށް ހުއްޓުނެވެ. އާއިލާގެ މީހުން ފަޅަން ތައްޔާރު ކުރި އުފަންދުވަހުގެ ކޭކު ބަހައްޓާފައި ޖޯންސް ދިޔައީ ދޮރާ ދިމާއަށެވެ.
ޖޯންސް ދޮރު ހުޅުވާލުމުން އޭނާއާ މުޚާތަބު ކުރި މީހާ ބުނީ ގެދޮރު ނެތް އާއިލާއެއް އެބަހުރި ކަމަށެވެ.
ހަމްދަރްދީ ފާޅުކުރަމުން ޖޯންސް ކާނާ ނުވަތަ ހެދުން ދޭންވީތޯ ސުއާލު ކުރިއެވެ. ކުރިމަތީގައި ހުރި މީހާ ހިނިތުންވެލަމުން ޖޯންސްއަށް ބުނީ އެމީހުން ބޭނުން ވަނީ ޖޯންސްގެ ގެ ކަމަށެވެ. މި އަގަލު ކުޑަ ވާހަކައިން ޖޯންސްގެ ހަމްދަރްދީ ރުޅިއަށް ބަދަލު ވެގެން ދިޔައެވެ.
އެސާހިތަކުން ސިފައިން އެގެއަށް ވެރިވެގަނެ، ޖޯންސްއާއާއި އޭނާގެ އާއިލާ މަގުމައްޗަށް ނެރެލައި ހާލުގައި ޖެހިފައި ތިބި މީހުންނާ ގެ ހަވާލު ކުރިއެވެ.
މިއީ ފަލަސްތީނަށް ޔަހޫދީން ހިޖުރަ ކުރިއިރު ފަލަސްތީނު މީހުންނާ މެދު ކަން ހިނގާފައިވާ ގޮތް ދެއްކުމަށް މަޖާޒީ ވާހަކައަކަށް އުފައްދާފައިވާ ފިލްމެކެވެ.
މިފިލްމަކީ ތުރުކީވިލާތުގައި އޮތް "ރަޙުމަތުލްލިލް ޢާލަމީން ފިލްމު ފެސްޓިވަލް"ގައި މީހުންގެ ސަމާލުކަން ހޯދި ފިލްމެކެވެ.
މި ފިލްމުން ދައްކަން ބޭނުންވީ އިނގިރޭސިންނާއެކު އެފަދަ ކަމެއް ހިނގާނަމަ ކަންވެގެންދާނީ އެ ޑްރާމާގައި ދައްކާ ބީދައިން ކަމަށެވެ.
މިފިލްމަކީ ލަންޑަންގައި ހުންނަ ފަލަސްތީނު މީހުން އެނބުރި، ފޭރިގެންފައިވާ ގެތަކަށް އެނބުރި ދިއުމާ ބެހޭ "ރިޓަރން ސެންޓަރާއި އިނގިރޭސިވިލާތުގެ "އެޕޮލޮޖީ ފޯރ ދަ ބެލްފޯ ޑިކްލެރޭޝަން" ކެމްޕޭން ގުޅިގެން ޕްރޮޑިއުސް ކޮށްފައިވާ ފިލްމެކެވެ.
މި ފިލްމުގައި ޖޯންސް ދޮރު ހުޅުވުމާ ހަމައަށް ފެންނަނީ މިޒާމާނުގެ އިނގިރޭސި ގެއެއްގެ މަންޒަރެކެވެ. އޭނާ ދޮރު ހުޅުވާފަހުން ކެމެރާ ބަދަލު ވެގެން ދަނީ 1917 ވަނަ އަހަރުގެ މަންޒަރަކަށެވެ. ފަލަސްތީނުގެ އާއިލާއެއް ބޭރަށް ލައި ޔަހޫދީން ގެއެއްގެ ފޭރިގަތުމަށެވެ. އިނގިރޭސިވިލާތުގެ ފަލަސްތީނުގެ ޑައިރެކްޓަރު އަނަސް އަލްކަރްމީ މިފިލްމު އުފައްދާފައި ވަނީ 2017 ވަނަ އަހަރު އެވެ.
11 މިނެޓްގެ ކުރު ފިލްމުގައި ދައްކާފައި ވަނީ މާތްﷲ ކައްވަޅުގައިވެސް އެމީހަކަށް ލައުނަތް ލައްވާނެ މީހާ ކަމަށްވާ އިނގިރޭސިވިލާތުގެ އެއިރުގެ ޚާރިޖީ ވަޒީރު އާތަރ ބެލްފޯރގެ މަޝްހޫރު ޑިކްލެރޭޝަންއާ ބެހޭ ގޮތުންނެވެ. ބެލްފޯރގެ މަޝްހޫރު ވައުދަކީ ޔަހޫދީންނަށް ޔޫގެންޑާ ދިނުމުން އެކަމާ ދެކޮޅު ހެދުމުން ފަލަސްތީނުގެ ބިން އެމީހުންނަށް ދިނުމަށް ވައުދުވި އިނގިރޭސިންގެ ވައުދެވެ.
ތުރުކީވިލާތުގެ "رحمة للعالمين" ފިލްމު ފެސްޓިވަލްއަކީ އާންމު ގޮތެއްގައި އިސްލާމީ ދީނީ ރޫޙާނީ ފިލްމުތަކާ ބެހޭ ފެސްޓިވަލެކެވެ. މިއީ އެހެން ގައުމުތަކުގައި ނަސާރާއިންނާއި ޔަހޫދީންގެ ރޫހާނީ އެފަދަ ފިލިމް ފެސްޓިވަލްތައް ބާއްވާތީ އެކަމާ ކުރިމަތި ލުމަށް ތުރުކީން އިންތިޒާމުކުރާ ފެސްޓިވަލެކެވެ.
މިއަހަރު އަރަބިންގެ އަދަދު މަދުކަން ފާހަގަ ވެއެވެ. އަދި ބައިވެރިކޮށްފައިވާ ފިލްމުތައްވެސް މަދުކަން ފާހަގަ ވެއެވެ.
ޖޯންސް ގެއިން ބޭރަށް ލައި އޭނާގެ ގެ ފޭރިގަންނަ މިފިލްމަކީ 100 ބެލްފޯރ ސްޓީޓްގެ ނަމުން ނަން ދީފައިވާ ފިމްމެކެވެ.
މިއީ އަރަބި އަދި އިސްލާމީ ސަގާފަތާ ގުޅޭ މައުޟޫއަކަށް ކުރު ފިލްމުތައް އުފެއްދުމަށް ފަންޑް ހޯދުމަށް ފުރުސަތު ހޯދައި ދިނުމަށް ބާއްވާ ފެސްޓިވަލެކެވެ. ރަޙުމަތުއްލިލްޢާލަމީން ފިލްމު ފެސްޓިވަލްގައި ހުރިހައި ފިލްމެއްވެސް ދެއްކުން އޮތީ ހިލޭއެވެ.
މި ފިލްމުތައް އަޅުވާފައި ވަނީ އަންކަރާގެ އިންޑިޕެންޑެންސް ސްޓްރީޓްގެ ސިނަމާ ތަކުގައެވެ. އެއީ ފަތުރުވެރިން އެންމެ ގިނައިން އުޅޭ ސަރަހައްދެވެ.
