ސައޫދީ އަރަބިއްޔާގައި އަރަބި ގައުމުތަކުގެ ވެރިންނާ އެކު ބޭއްވެވި ސަމިޓަށްފަހު ޗައިނާގެ ރައީސް ޝީ ޖިންޕިން ވިދާޅުވެފައި ވަނީ 1967 ވަނަ އަހަރުގެ ބޯޑަރުތަކުގައި ގުދުސް ވެރިރަށުގެ ގޮތުގައި ފަލަސްތީނުގެ ދައުލަތެއް ގާއިމްކުރުމަށް ޗައިނާއިން ތާއީދުކޮށް މަސައްކަތް ކުރާނެ ކަމަށެވެ. އަދި ފަލަސްތީނުގެ މައްސަލައަކީ މެދުއިރުމަތީގައި ސުލްހައާއި ހަމަޖެހުމާ ގުޅޭ މައްސަލައެއް ކަމަށެވެ.
އޭގެ އިތުރުން ގަލްފްގެ ގައުމުތަކުގެ ޖަމުއިއްޔާގެ ވެރިންނާއެކުވެސް ސަމިޓް ބައްދަލުވުމެއް ބޭއްވެވިއެވެ. އސެސަމިޓަށްފަހު ގުޅިފައިވާ ބަޔާނުގައި ބުނެފައި ވަނީ ދެ ފަރާތުގެ އިގްތިސާދީ ޕާޓްނަޝިޕް ހަރުދަނާކޮށް، ޗައިނާ އާއި ޖީސީސީ ގައުމުތަކުން ލޯކަލް ކަރަންސީ ބޭނުންކޮށްގެން ކަރަންސީން ޕޭމަންޓް ސިސްޓަމް އެކްޓިވޭޓް ކުރުމަށް ޗައިނާއިން މަސައްކަތް ކުރާނެ ކަމަށެވެ.
ޗައިނާގެ ރައީސް ވަނީ ގަތަރުގައި ބާއްވާފައިވާ 2022 ވަނަ އަހަރުގެ ވޯލްޑް ކަޕް އިންތިޒާމު ކުރުމުގައި ގަތަރުން ކޮށްފައިވާ މަސައްކަތަށް ތައުރީފް ކޮށްފައެވެ.
ސައޫދީ އަރަބިއްޔާއިން ބުނެފައި އެމެރިކާ އާއި ޗައިނާގެ އިގްތިސާދީ ދެ ވާދަވެރި ދެ ގައުމާއެކު ވެސް މަސައްކަތް ކުރަން ބޭނުންވާ ކަމަށާއި ރިޔާޒުން ދުނިޔެ އެއްކޮޅަކަށް ބުރަވެފައިވާ ކަމަށް ބަލައިގެން އެއް ފަރާތަކާއި މުއާމަލާތުކޮށް ނިންމާލަން ބޭނުން ނުވާ ކަމަށެވެ.
ޗައިނާ-ގަލްފް ސަމިޓަށްފަހު ބޭއްވި ފުރަތަމަ ޗައިނާ-އަރަބި ސަމިޓުގެ ބައިވެރިން އެއްބަސްވީ "ބެލްޓް އެންޑް ރޯޑް އިނިޝިއޭޓިވް" ތަންފީޒުކުރުމުގައި ޕާޓްނަޝިޕް ހަރުދަނާކުރުމަށާއި ޗައިނާ-އަރަބި ސަމިޓްގެ ދެވަނަ އެޑިޝަން ބެއިޖިންގައި ބޭއްވުމަށް އެއްބަސްވެފައެވެ. އަދި ދެފަރާތުގެ މަޝްވަރާގެ މަތިން އެކަމަށް ފަހުން ތާރީޚެއް ކަނޑައެޅުމަށް އެއްބަސްވެފައި ވެއެވެ.
ޗައިނާ އަރަބި ސަމިޓްގެ ނިންމުމުގެ ބަޔާނުގައި ފާހަގަކޮށްފައިވަނީ "ޑިމޮކްރަސީ ދެމެހެއްޓުމުގެ ބަހަނާގައި ދައުލަތްތަކުގެ އެތެރޭގެ ކަންކަމުގެ ތެރެއަށް ވަދެގަތުމަށް ދެކޮޅު" ހަދާ ކަމަށެވެ. ސަމިޓް ފެށުމުގެ ރަސްމިއްޔާތުގައި ސައުދީ ވަލީއަހުދު މުޙައްމަދު ބިން ސަލްމާން ވިދާޅުވީ އަރަބި ގައުމުތަކުގެ އަމާޒަކީ ޗައިނާއާ އެކު އެއްބާރުލުން ދިނުމުގެ ފެންވަރު މަތިކުރުމާއި ޗައިނާއާއެކު ޕާޓްނަޝިޕްގެ އާ މަރުހަލާއެއް ބައްޓަން ކުރާށެވެ.
އަނެއްކޮޅުން ޗައިނާގެ ރައީސް ސިފަކުރެއްވި ގޮތުގައި އަރަބި ޗައިނާ ސަމިޓަކީ އަރަބި ޗައިނާގެ ގުޅުމުގެ ތާރީހުގައި މުހިންމު ކަމެއް ކަމަށާއި، އެކަމުގެ ސަބަބުން ރަނގަޅު މުސްތަގުބަލެއް ފަހިވެގެންދާނެ ކަމަށެވެ.
ސައޫދީ ވަލީ ޢަހުދު ފާހަގަ ކުރެއްވި ގޮތުގައި އަރަބި ގައުމުތަކުން ޗައިނާއާއެކު 300 ބިލިއަން ޑޮލަރުގެ ވިޔަފާރި ކުރެއެވެ.
ސައުދީ ކުންފުނިތަކާއި ޗައިނާގެ ކުންފުނިތަކުން ޗައިނާ ރައީސްގެ ދަތުރުފުޅުގައި 34 އިންވެސްޓްމަންޓް އެއްބަސްވުމެއްގައި ސޮއިކޮށްފައި ވެއެވެ. ދެ ފަރާތުގެ އެއްބަސްވުންތަކުގައި ފެހި ހަކަތަ، ފެހި ހައިޑްރޯޖަން، ފޮޓޯވޮލްޓިކް ހަކަތަ، އިންފޮމޭޝަން ޓެކްނޮލޮޖީ، ކްލައުޑް ކޮމްޕިއުޓިންގ ސާވިސް، ދަތުރުފަތުރު، ލޮޖިސްޓިކްސް، މެޑިކަލް އިންޑަސްޓްރީ، ހައުސިން އަދި ކޮންސްޓްރަކްޝަންގެ ދާއިރާތަކުގެ އެއްބަސްވުން ހިމެނެއެވެ.
