އޭނާގެ ބޮލުން ފޮނުވާލި ބޯޅައިން ފަރަންސޭސިންނަށް އެމީހުންގެ ގެއްލިފައި ވޯލްޑްކަޕްގެ ހުވަފެން 12 ޖުލައި 1998ގައި އަނބުރައި ލިބުނެވެ. އެއީ ފަރަންސޭސިން 40 އަހަރު ވަންދެން ދެކެމުން އައި ހުވަފެނެކެވެ. ފަރަންސޭސިންގެ ވޯލްޑް ކަޕްގެ ކާމިޔާބީއަކީ ޒަމާނުއްސުރެން އަލްޖަޒާރިއު މީހުންނާ ގުޅިފައިވާ ކާމިޔާބީއެކެވެ. ޒައިނުއްދީން ޒީދާން އެކާމިޔާބީ ހޯދައި ދިން ގޮތަށް 1958ގައި ސުއިޑްންގައި އޮތް ވޯލްޑް ކަޕްގައި ފަރަންސޭސިންގެ ނާކާމިޔާބީގެ އަސްލަކީވެސް އަލްޖަޒާއިރު ކުޅުން ތެރިންނެވެ.
ފަރަންސޭސިންނަކީ ހުތުރުވެގެންވާ އަނިޔާވެރި އިސްތިއުމާރެއް އަލްޖަޒާއިރުގައި ހިންގައި، އަންހެނުންގެ އިއްފަތް ފޭރިގަނެ މީހުންގެ ގަތުލުއާންމު ހިންގައި ގައުމެއް އެއްކޮށް ލޫޓުވާލި ޓެރަރިސްޓް ގައުމެކެވެ. އަލްޖަޒާއިރުގެ ދޮޅު މިލިއަން މީހުން ފަރަންސޭސިން ޝަހީދުކޮށްލިއެވެ.
1958ގެ ޖޫން މަހު ސުއިޑްންގައި ބޭއްވި ވަރލްޑް ކަޕަކީ ހަ ވަނަ ފީފާ ވަރލްޑް ކަޕެވެ. ފަރަންސޭސި ޓީމުތަކަށް ކުޅުނު އެންމެ މޮޅު ކުޅުންތެރިންނަކީ އަލްޖަޒާއިރުގެ ކުޅުންތެރިންނެވެ.
އަލްޖަޒާއިރުގެ މިނިވަންކަމަށް ހަނގުރާމަ ކުރަމުން ދިޔަ ޖަމާއަތުން ބޭނުންވީ އަލްޖަޒާއިރު ކުޅުންތެރިން ފަރަންސޭސިވިލާތް ދޫކޮށް އެމީހުންގެ ގައުމަށް ކުޅޭށެވެ.
ދެވަނަބޮޑު ހަނގުރާމަ ނިމުމާއެކު ފަރަންސޭސިންނާ ދެކޮޅަށް ސަތީފު ސިޓީގައި ނިކުތް މީހުންނާއި ފަރަންސޭސި ސިފައިން ކުރިމަތިލީ ބަޑިންނެވެ. ހަތިޔާރު އަނަޅައި ތިބި މަދަނީންގެ ގިނަބައެއް، ފަރަންސޭސިން ހިންގި ގަތުލު އާންމުގައި މަރައިލިއެވެ. އެހާދިސާއަށް ފަހު އަލްޖަޒާއިރުގެ މިނިވަންކަމަށް މަސައްކަތް ކުރި ފަރާތްތަކުން ބޭނުންވީ އަމިއްލަ ފުޓުބޯޅަ ޓީމެއް އެކުލަވާލާށެވެ.
ފަރަންސޭސި ބޮޑެތި ޓީމުތަކަށް ކުޅުނު، އަލްޖަޒާއިރުގެ މުސްތަފާ ޒައިތޫނީ، ރަޝީދު މަޚުލޫފީ، ސަޢީދު އަމާރާ އަދި އަބްދުލް އަޒީޒު ތައިފޫރު ފަދަ ކުޅުންތެރިންނާއެކު އެކި ކްލަބްތަކުން 11 ކުޅުން ހަމަކޮށްލެވުނެވެ. ފަރަންސޭސިންނަށް ސިއްރުން އަލްޖަޒާއިރުގެ ހަނގުރާމަވެރިންގެ ރޭވުމެއްގެ ތެރޭން އެންމެން ފަރަންސޭސިވިލާތުން ބޭރުކޮށްގެން އިޓަލީގެ ރޯމަށް ގެންގޮސްގެން އެމީހުންނަށް ޓިއުނީސިއާގެ ޕާސްޕޯޓްތައް ދީގެން އަލްޖަޒާއިރަށް ގެންދެވުނެވެ.
1958ގެ ވޯލްޑް ކަޕްގައި ފަރަންސޭސިންނަށް ނާކާމިޔާބީއާ ކުރިމަތލާން މެދުވެރި ކުރީ އަލްޖަޒާއިރުގެ ކުޅުންތެރިންނެވެ. ފަރަންސޭސިން ހެނދުނު ހޭލިއިރު ނޫސްތަކުގެ ސުރުޚީތަކުން އެނގުނީ ޓީމުތަކަށާއި ގައުމީ ޓީމަށް ކުޅުނު އަލްޖަޒާއިރު ކުޅުން ތެރިން ފިލައިގެން އަލްޖަޒާއިރަށް ގޮސްފި ކަމަށެވެ.
އެއް ނޫހެއްގައި ބުނެފައި ވަނީ "ޕެރިހުގައި އެހާ ރަގަޅު ދިރިއުޅެއް ލިބިފައި އޮތްވައި އެމީހުން ބުރުގާ އަޅައިގެން އުޅޭ އަންހެނުންތަކެއްގެ ކައިރިއަށް އަލްޖަޒާއިރަށް ދިޔައީ ކީއްވެގެން ހެއްޔެވެ؟"
އަލްޖަޒާއިރުގެ ޓީމުން ކުޅުނު ހުރިހައި މެޗުތަކެއްގައި މޮޅުވިއެވެ.
އެއަށްފަހު ފަރަންސޭސިން އިސްވެ އޮވެގެން ފީފާ މެދުވެރިކޮށް އެޅި ފިޔަވަޅުގައި އަލްޖަޒާއިރަށް ވަރލްޑް ކަޕްގައި ބައިވެރިވާން ފުރުސަތެއް ނުލިބުނެވެ. އަދި އެހެން ޓީމުތަކަށްވެސް އަލްޖަޒާއިރާއެކު ކުޅުން މަނާ ކުރިއެވެ. ނަމަވެސް މިސްރު ފިޔަވައި އެހެން ގައުމުތަކުގެ ޓީމުތަކުން އަލްޖަޒާއިރު ޓީމާއެކު ތަމްރީންތައް ބާއްވައި މުބާރާތްތައް ކުޅުނެވެ.
މިސްރުން އެކަމަށް އުޒުރު ވެރިވީ ފީފާގެ ނާއިބް ރައީސްކަމުގައި މިސްރު މީހަކު ހުރުމުންނެވެ.
އަލްޖަޒާއިރުގެ ޑިޕްލޮމެސީގެ އިތުރުން އެމީހުންގެ މިނިވަންކަމަށް އެ ގައުމީ ޓީމުން އެހީތެރިވެދީ އެގައުމުގެ ދިދަ އުފުލައި އަލްޖަޒާއިރު އަޑު އިއްވިއެވެ.
ދިގު ދެމިގެންވާ ފަރަންސޭސި އަނިޔާވެރި އިސްތިއުމާރަކަށްފަހު ޑިގޮލްއަށް މަޖުބުރުވެގެން 5 ޖުލައި 1962ގައި އަލްޖަޒާއިރަށް މިނިވަންކަން ދިނެވެ!
އެއީ ފުޓްބޯޅައާއި ޑިޕްލޮމެސީގެ ކާމިޔާބު ވާހަކައެކެވެ. އަލްޖަޒީރާ
