މޮރޮކޯ ގައުމީ ޓީމުގެ ހުނަރުވެރި ވިންގަރ ހަކީމް ޒިޔެޗް، 2015 ވަނަ އަހަރުން ފެށިގެން ގައުމީ ޓީމުން އޭނާއަށް ލިބޭ މުސާރަ އެއްކޮށް ހޭދަކުރަނީ ފަގީރުންނަށާއި ގައުމީ ޓީމުގެ ބައެއް އޮފިޝަލުންނަށް ކަމަށް މަޝްހޫރު ބްލޮގާ ޚާލިދު ބޭދޫން ހާމަކޮށްފިއެވެ.
އުމުރުން 29 އަހަރުގެ ޒިޔެޗަކީ މިފަހަރު މޮރޮކޯއިން ވަރލްޑް ކަޕުގައި ނެރެމުންދާ ހައިރާން ކުރުވަނިވި ނަތީޖާތަކުގައި އެންމެ ބޮޑަށް ފާހަގަ ކޮށްލެވޭ އެއްކުޅުންތެރިޔާއެވެ. ނެދަލޭންޑްސްއަށް އުފަން ޒިޔެޗް މޮރޮކޯ ގައުމީ ޓީމަށް ކުޅެން ފެށީ 2015 ވަނަ އަހަރުއެވެ. އެކަމަކު މިއަހަރުގެ ފެބްރުއަރީ މަހު އޭރު މޮރޮކޯގެ ކޯޗަކަށް ހުރި ވާހިދު ހަލީލްހޮޑްޒިކާ ޖެހުނު މައްސަލައެއްގައި ގައުމީ ޓީމުން ރިޓަޔަރ ކުރިކަން ޒިޔެޗް އިއުލާން ކުރިއެވެ. ޒިޔެޗް އެނބުރި ގައުމީ ޓީމުގެ ހިދުމަތަށް ނިކުތީ މިއަހަރުގެ އޮގަސްޓްމަހު ހަލީލްހޮޑްޒިކާ މަގާމުން ވަކިކޮށް ވަލީދު ރެގްރަގޫއާ މޮރޮކޯ ގައުމީ ޓީމުގެ ހަވާލު ކުރުމުންނެވެ.
ބްލޮގާ ޚާލިދު ބޭދޫން ހާމަކޮށްފައިވާ ގޮތުގައި ޒިޔެޗަށް ގައުމީ ޓީމުންދޭ މުސާރަ އޭނާ ހަރަދު ކުރަނީ މޮރޮކޯގެ ފަގީރުންނަށެވެ. މީގެ އިތުރު ތަފްސީލްތަކެއް ހާމަކޮށްފައެއް ނުވެއެވެ. މޮރޮކޯ ގައުމީ ޓީމުން ކުޅުންތެރިންނަށްދޭ މުސާރަ މިހާތަނަށް ހާމަކޮށްފައެއް ނުވެއެވެ.
މިފަހަރުގެ ވަރލްޑް ކަޕުގެ ސެމީފައިނަލުން ޖާގަ ހޯދާފައިވާ މޮރޮކޯ ގައުމީ ޓީމަށް ދުނިޔޭގެ އެކިކަންކޮޅުތަކުން ދަނީ ތައުރީފް އޮހެމުންނެވެ. 99 އިންސައްތަ މުސްލިމުން ދިރިރުއެޅޭ މޮރޮކޯ ގައުމީ ޓީމުގެ ކޮންމެ ހަރަކާތަކަށް ފުޓްބޯޅައިގެ ދުނިޔޭގެ ސަމާލުކަން މިހާރު އޮތީ ހުއްޓިފައެވެ.
